സാക്ഷരതാ പരീക്ഷയിൽ നൂറുമേനി വിജയം നേടി ആറളം ഫാം ആദിവാസി ഊരുകൂട്ടങ്ങൾ. പരീക്ഷയെഴുതിയ 434 പേരും വിജയംകണ്ടു.
ജില്ലാ സാക്ഷരതാമിഷനും കുടുംബശ്രീ മിഷനും ഫാമിൽ നടപ്പാക്കിയ ‘ആദിശ്രീ’ പദ്ധതി ഇതോടെ അറിവിന്റെ ലോകത്തിലേക്കുള്ള വിജയവെട്ടമായിമാറി. ഇനി ആദിവാസി മേഖലയിലുള്ളവർ എഴുത്തിന്റെയും വായനയുടെയും ലോകത്തെത്തും.
പരീക്ഷയിൽ വിജയിച്ചവർക്കുള്ള സർട്ടിഫിക്കറ്റുകൾ മന്ത്രി കെ രാധാകൃഷ്ണൻ വിതരണം ചെയ്തു. വിദ്യാഭ്യാസ നിലവാരം ഉയർത്തി ഓരോ പട്ടികവർഗ കുടുംബത്തിലും ഒരാൾക്ക് ജോലിയെത്തിക്കലാണ്‌ സർക്കാർ ലക്ഷ്യമെന്നും തുടർ വിദ്യാഭ്യാസത്തിന്‌ സ്‌കോളർഷിപ്പ് നൽകുമെന്നും മന്ത്രി പറഞ്ഞു. സണ്ണി ജോസഫ് എംഎൽഎ അധ്യക്ഷനായി.
ഫാമിൽ ലൈബ്രറി വ്യാപന മിഷൻ നേതൃത്വത്തിൽ വായനശാലകളും തുറക്കുന്നതോടെ വായനയ്‌ക്കും ഇടമൊരുങ്ങും.