കണ്ണൂര്: കുടുംബശ്രീ മിഷന്റെ നേതൃത്വത്തില് സംസ്ഥാനത്ത് സ്ത്രീധനം, സ്ത്രീപീഡനം എന്നിവക്കെതിരെ “സ്ത്രീപക്ഷ നവകേരളം’ എന്ന പ്രചരണ പരിപാടി ആരംഭിക്കും. പരിപാടിയുടെ സംസ്ഥാനതല ഉദ്ഘാടനം 18ന് ഉച്ചകഴിഞ്ഞ് മൂന്നിന് തിരുവനന്തപുരം നിശാഗന്ധി ഓഡിറ്റോറിയത്തില് മുഖ്യമന്ത്രി പിണറായി വിജയന് ഉദ്ഘാടനം ചെയ്യുമെന്ന് മന്ത്രി എം.വി. ഗോവിന്ദൻ പത്രസമ്മേളനത്തില് അറിയിച്ചു.
അന്താരാഷ്ട്ര വനിത ദിനമായ മാര്ച്ച് എട്ടുവരെ കാന്പയിനും മറ്റ് പരിപാടികളും സംഘടിപ്പിക്കും. മന്ത്രിമാരായ ആർ.ബിന്ദു, ജെ. ചിഞ്ചുറാണി, വീണാജോർജ്, വനിതാ കമ്മീക്ഷൻ അധ്യക്ഷ പി. സതീദേവി, തദ്ദേശ സ്വയംഭരണ വകുപ്പ് അഡീഷണൽ ചീഫ് സെക്രട്ടറി ശാരദാ മുരളീധരൻ എന്നിവർ ഉദ്ഘാടന ചടങ്ങിൽ പങ്കെടുക്കും. പോസ്റ്റര് കാന്പയിൻ, സ്ത്രീധനത്തിന് എതിരായ സോഷ്യല് മീഡിയ ചലഞ്ച്, റീല്സ് വീഡിയോ തയാറാക്കല് തുടങ്ങി സാമൂഹ്യമാധ്യമങ്ങളുടെ സാധ്യതകള് ഉപയോഗപ്പെടുത്തിയുള്ള പ്രചരണങ്ങള്, ചുവര്ചിത്ര കാന്പയിൻ, കോളജ് വിദ്യാര്ഥികള്ക്കുള്ള വെബിനാറുകള്, സ്ത്രീധനം സംബന്ധിച്ചുള്ള അഭിപ്രായ സര്വേ, ഇരുചക്ര വാഹന റാലി, ബാലസഭകള്, സ്കൂള് വിദ്യാര്ഥികള്ക്ക് വേണ്ടിയുള്ള കാമ്പയിന്, കാര്ട്ടൂണ് സീരീസ് തുടങ്ങി വിവിധ പരിപാടികള് സംഘടിപ്പിക്കും. 14 ജില്ലകളില് നിന്നുമുള്ള കുടുംബശ്രീ പ്രതിനിധികള് ഉദ്ഘാടന വേദിയില്വച്ച് സ്ത്രീപക്ഷ നവകേരളത്തിന്റെ സമീപനരേഖ പ്രകാശനം ചെയ്യും. കാന്പയിന്റെ സംസ്ഥാനതല സമാപന പരിപാടിയില് അന്തര്ദേശീയ തലത്തില് ശ്രദ്ധ നേടിയ വ്യക്തികളെ പങ്കെടുപ്പിക്കും. പത്രസമ്മേളനത്തില് സംസ്ഥാന കുടുംബശ്രീ മിഷന് ഡയറക്ടര് പി.ഐ. ശ്രീവിദ്യ പങ്കെടുത്തു.