സിപിഎം കണ്ണൂർ ജില്ലാ സമ്മേളനത്തിന് തുടക്കം കുറിച്ച് ചെങ്കൊടി ഉയർന്നു. ആവേശം നിറഞ്ഞ അന്തരീക്ഷത്തിൽ സ്വാഗതസംഘം ചെയർമാൻ ടി.വി. രാജേഷ് പതാക ഉയർത്തി. കേന്ദ്രക്കമ്മിറ്റി അംഗങ്ങളായ ഇ.പി. ജയരാജൻ, പി.കെ. ശ്രീമതി, എം.വി. ഗോവിന്ദൻ, കെ.കെ. ശൈലജ, എന്നിവരും സംസ്ഥാന കമ്മിറ്റി അംഗങ്ങളായ എം.വി. ജയരാജൻ, പി. ജയരാജൻ, കെ.പി. സഹദേവൻ, ജയിംസ് മാത്യു, ജനറൽ കൺവീനർ കെ പത്മനാഭൻ എന്നിവരും പങ്കെടുത്തു.
കരിവെള്ളൂർ രക്തസാക്ഷി സ്മൃതി മണ്ഡപത്തിൽ കേന്ദ്ര കമ്മിറ്റി അംഗം പി.കെ. ശ്രീമതി ഉദ്ഘാടനം ചെയ്ത് ടി.ഐ. മധുസൂദനൻ എംഎൽഎ നയിച്ച പതാക ജാഥയും, കാവുമ്പായി രക്തസാക്ഷികളുടെ മണ്ണിൽ നിന്നും ജില്ലാ സെക്രട്ടറി എം.വി. ജയരാജൻ ഉദ്ഘാടനം ചെയ്ത് ടി.കെ. ഗോവിന്ദൻ നയിച്ച കൊടിമര ജാഥയും കണ്ണൂരിൽ എകെജി പ്രതിമയ്ക്ക് മുന്നിൽ കേന്ദ്ര കമ്മിറ്റി അംഗം ഇ.പി. ജയരാജൻ ഉദ്ഘാടനം ചെയ്ത് എൻ. ചന്ദ്രൻ നയിച്ച ദീപശിഖാ റിലേയും പഴയങ്ങാടിയിലെ സമ്മേളന നഗരിയിൽ സംഗമിച്ചു.തുടർന്ന് ചുവപ്പു വോളണ്ടിയർമാരുടെ അകമ്പടിയോടെ ജാഥകൾ പൊതുസമ്മേളന നഗരിയിലേക്ക് പ്രവഹിച്ചു.
ഇന്ന് രാവിലെ 9.30ന് ജില്ലാ കമ്മിറ്റിയംഗവും മുതിർന്ന നേതാവുമായ ഒ.വി. നാരായണൻ പ്രതിനിധിസമ്മേളന നഗരിയിൽ പതാക ഉയർത്തും. 10 ന് മാടായി കോ- ഓപ്പറേറ്റീവ് റൂറൽ ബാങ്ക് ഓഡിറ്റോറിയത്തിൽ മുഖ്യമന്ത്രിപിണറായി വിജയൻ പ്രതിനിധി സമ്മേളനം ഉദ്ഘാടനം ചെയ്യും. 250 പ്രതിനിധികളും 53 ജില്ലാ കമ്മിറ്റി അംഗങ്ങളും ജില്ലയിൽനിന്നുള്ള സംസ്ഥാന കമ്മിറ്റിയംഗങ്ങളും പങ്കെടുക്കും.
സംസ്ഥാന സെക്രട്ടറി കോടിയേരി ബാലകൃഷ്ണൻ, കേന്ദ്ര കമ്മിറ്റി അംഗങ്ങളായ എ. വിജയരാഘവൻ, ഇ.പി. ജയരാജൻ, പി.കെ. ശ്രീമതി, എം.വി. ഗോവിന്ദൻ, കെ.കെ. ശൈലജ, സംസ്ഥാന സെക്രട്ടറിയറ്റ്‌ അംഗം ആനത്തലവട്ടം ആനന്ദൻ എന്നിവർ സമ്മേളനത്തിൽ പങ്കെടുക്കും. വൈകുന്നേരം അഞ്ചിന് മാധ്യമ സെമിനാർ മന്ത്രി പി. രാജീവ് ഉദ്ഘാടനം ചെയ്യും. നാളെ വൈകുന്നേരം അഞ്ചിന് ‘മതനിരപേക്ഷത നേരിടുന്ന വെല്ലുവിളികൾ’ സെമിനാർ എ. വിജയരാഘവൻ ഉദ്ഘാടനം ചെയ്യും. ഞായറാഴ്ച വൈകുന്നേരം നാലിന്‌ പൊതുസമ്മേളനത്തോടെ സമ്മേളനം സമാപിക്കും.