തലശേരി: പൗരോഹിത്യ സുവർണ ജൂബിലി പ്രഭയിൽ മലബാറിന്റെ ഇടയശ്രേഷ്ഠന് നാടിന്റെ സമാദരം. സഭാശ്രേഷ്ഠർ ഉൾപ്പെടെ പൗരപ്രമുഖരെയും അല്മായ-സാസ്കാരിക-രാഷ്ട്രീയ പ്രതിനിധികളെയും സാക്ഷികളാക്കി ലാളിത്യത്തിന്റെ പിതാവ് തലശേരി ആർച്ച്ബിഷപ് മാർ ജോർജ് ഞറളക്കാട്ടിന്റെ പൗരോഹിത്യ സുവർണ ജൂബിലി ആഘോഷം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു.
അര നൂറ്റാണ്ടിന്റെ പൗരോഹിത്യ ജീവിതത്തിൽ ദൈവം നൽകിയ അനുഗ്രഹങ്ങൾക്കു നന്ദി പറഞ്ഞ് മാർ ജോർജ് ഞറളക്കാട്ടിന്റെ നേതൃത്വത്തിൽ സെന്റ് ജോസഫ്സ് കത്തീഡ്രലിൽ ജൂബിലി കുർബാന അർപ്പിച്ചായിരുന്ന അനുഗ്രഹീത ചടങ്ങിന് തുടക്കം. സീറോ മലബാർ സഭ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി ഉൾപ്പെടെ 14 ബിഷപ്പുമാർ ചേർന്ന് അർപ്പിച്ച സമൂഹബലിയിൽ അതിരൂപതാ വൈദികസമൂഹത്തെ പ്രതിനിധാനം ചെയ്ത് 70 വൈദികരും സഹകാർമികരായിരുന്നു. ബൽത്തങ്ങാടി ബിഷപ് മാർ ലോറൻസ് മുക്കുഴി ആമുഖസന്ദേശം നൽകി. ആർച്ച്ബിഷപ് എമെരിറ്റസ് മാർ ജേക്കബ് തൂങ്കുഴി വചനസന്ദേശം നൽകി.
ആർച്ച്ബിഷപ് എമെരിറ്റസ് മാർ ജോർജ് വലിയമറ്റം, ബിഷപ്പുമാരായ മാർ ജോസ് പൊരുന്നേടം (മാനന്തവാടി), മാർ റെമിജിയോസ് ഇഞ്ചനാനിയിൽ (താമരശേരി), മാർ ജോസഫ് അരുമച്ചാടത്ത് (ഭദ്രാവതി), മാർ ജോസഫ് പണ്ടാരശേരിൽ (കോട്ടയം അതിരൂപത സഹായ മെത്രാൻ), ബിഷപ് ഡോ. വർഗീസ് ചക്കാലയ്ക്കൽ (കോഴിക്കോട്), ബിഷപ് ഡോ. അലക്സ് വടക്കുംതല (കണ്ണൂർ), ബിഷപ് ജോസഫ് മാർ തോമസ് (ബത്തേരി) എന്നിവരും കാർമികരായിരുന്നു. നേരത്തെ കത്തീഡ്രൽ കവാടത്തിലെത്തിയ ജൂബിലേറിയന്മാർ മാർ ജോർജ് ഞറളക്കാട്ടിനെയും കർദിനാളിനെയും ബിഷപ്പുമാരെയും അതിരൂപത സഹായമെത്രാൻ മാർ ജോസഫ് പാംപ്ലാനി പൂക്കൾ നൽകി വരവേറ്റു.
വിശുദ്ധ കുർബാനയ്ക്കുശേഷം കോവിഡ് പ്രോട്ടോകോൾ പാലിച്ച് നടന്ന പൊതുസമ്മേളനത്തിൽ സമൂഹത്തിലെ നാനാതുറകളിലെ പ്രമുഖ വ്യക്തിത്വങ്ങൾ പങ്കുചേർന്ന് മലബാറിന്റെ വലിയ ഇടയനോടുള്ള ആദരവ് പ്രകടിപ്പിച്ചു. ചടങ്ങിൽ മേജർ ആർച്ച് ബിഷപ് കർദിനാൾ മാർ ജോർജ് ആലഞ്ചേരി അധ്യക്ഷത വഹിച്ചു.
ജൂബിലിസ്മാരകമായി അതിരൂപത നടപ്പാക്കുന്ന വിവിധ ജീവകാരുണ്യ പദ്ധതികളുടെ ഉദ്ഘാടനം കേന്ദ്ര വിദേശകാര്യ-പാർലമെന്ററികാര്യ സഹമന്ത്രി വി.മുരളീധരൻ, വടകര എംപി കെ.മുരളീധരൻ, ആർച്ച്ബിഷപ് എമെരിറ്റസ് മാർ ജോർജ് വലിയമറ്റം എന്നിവർ നിർവഹിച്ചു.
ജൂബിലി സ്മരണിക പ്രകാശനം കോഴിക്കോട് ബിഷപ് ഡോ.വർഗീസ് ചക്കാലയ്ക്കൽ നിർവഹിച്ചു. യൂത്ത്ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവറലി ശിഹാബ് തങ്ങൾ, രാജ്മോഹൻ ഉണ്ണിത്താൻ എംപി എന്നിവർ മുഖ്യാതിഥികളായിരുന്നു. എംഎൽഎമാരായ എ.എൻ.ഷംസീർ, സണ്ണി ജോസഫ്, സജീവ് ജോസഫ്, അതിരൂപത വികാരിജനറാൾ മോൺ.ജോസഫ് ഒറ്റപ്ലാക്കൽ, തലശേരി നഗരസഭ ചെയർപേഴ്സൻ കെ.എം. ജമുനാറാണി ടീച്ചർ, എംഎസ്എംഐ പ്രൊവിൻഷ്യൻ സുപ്പീരിയർ സിസ്റ്റർ ആൻസി മാത്യു, അതിരൂപത പാസ്റ്ററൽ കൗൺസിൽ സെക്രട്ടറി ജോർജ് തയ്യിൽ എന്നിവർ പ്രസംഗിച്ചു. തുടർന്ന് ജൂബിലേറിയൻ മാർ ജോർജ് ഞറളക്കാട്ട് മറുപടിപ്രസംഗം നടത്തി. അതിരൂപത സഹായമെത്രാൻ മാർ ജോസഫ് പാംപ്ലാനി സ്വാഗതവും വികാരി ജനറാൾ മോൺ.അലക്സ് താരാമംഗലം നന്ദിയും പറഞ്ഞു.
കത്തീഡ്രൽ ഗായകസംഘം ജൂബിലിഗാനം ആലപിച്ചു. ചടങ്ങിനുശേഷം സമൂഹത്തിന്റെ വിവിധ മേഖലയിലുള്ളവർ ജൂബിലേറിയനെ ഷാളണിയിച്ച് ആദരിച്ചു.