കണ്ണൂർ: കല്യാശേരി ഗ്രാമപഞ്ചായത്തിന്‍റെയും കണ്ണൂര്‍ മലബാര്‍ കാന്‍സര്‍ കെയര്‍ സൊസൈറ്റിയുടെയും സംയുക്താഭിമുഖ്യത്തില്‍ ജനകീയ ആസൂത്രണ പദ്ധതിയുടെ ഭാഗമായി സമഗ്ര കാന്‍സര്‍ നിയന്ത്രണ പദ്ധതിക്ക് തുടക്കമായി.ആദ്യഘട്ടമായ സന്നദ്ധ പ്രവര്‍ത്തകര്‍ക്കുള്ള തീവ്ര പരിശീലന പരിപാടിക്ക് തുടക്കം കുറിച്ചു. ആശാവര്‍ക്കര്‍മാര്‍, കുടുംബശ്രീ അംഗങ്ങള്‍, ആരോഗ്യവകുപ്പ് ഉദ്യോഗസ്ഥര് തുടങ്ങിയവര്‍ക്കാണ് വളണ്ടിയര്‍ പരിശീലനം നല്‍കിയത്. പദ്ധതിയുടെ അടുത്ത ഘട്ടമായി പരിശീലനം ലഭിച്ച ആറ് വളണ്ടിയര്‍മാര്‍ 7149 വീടുകളില്‍ കാന്‍സര്‍ ബോധവല്‍ക്കരണം, കാന്‍സര്‍ സാധ്യതാലക്ഷണം ഉള്ളവരെ കണ്ടെത്തല്‍, സര്‍വേ എന്നി പ്രവര്‍ത്തനങ്ങള്‍ നടത്തും. സംശയിക്കുന്നവരെ ഗ്രാമതല ഫില്‍റ്റര്‍ ക്യാമ്പില്‍ എംസിസിഎസിന്‍റെ വിദഗ്ധ ഡോക്ടര്‍മാരുടെ നേതൃത്വത്തില്‍ പരിശോധന നടത്തുകയും ചെയ്യും. അള്‍ട്രാസൗണ്ട് സ്‌കാന്‍, ഡിജിറ്റല്‍ മാമോഗ്രാം, ലാബ്, വീഡിയോ കോണ്‍ഫറന്‍സിംങ് സംവിധാനം തുടങ്ങിയവ ഉപയോഗപ്പെടുത്തിയാണ് പരിശോധന. മലബാര്‍ കാന്‍സര്‍ സെന്‍ററില്‍ ചികിത്സയ്ക്ക് വേണ്ട മാര്‍ഗനിര്‍ദ്ദേശങ്ങളും ലഭ്യമാക്കും.
കാന്‍സര്‍ നിയന്ത്രണ പദ്ധതിക്ക് തുടക്കം
