മട്ടന്നൂര്‍: വിവിധ കുടിവെള്ള പദ്ധതികളിലൂടെ മട്ടന്നൂര്‍ മണ്ഡലത്തിലെ എല്ലാ പഞ്ചായത്തിലും നഗരസഭയിലും മുഴുവന്‍ ജനങ്ങള്‍ക്കും ശുദ്ധജല വിതരണം ഉറപ്പാക്കുമെന്ന് കെ.കെ. ശൈലജ എംഎല്‍എ. ഇരിട്ടി-മട്ടന്നൂര്‍ കുടിവെള്ള പദ്ധതി മുന്‍ എല്‍ഡിഎഫ് സര്‍ക്കാറിന്‍റെ കാലത്ത് രണ്ട് നഗരസഭകളിലെയും കുടിവെള്ള പ്രശ്‌നം പരിഹരിക്കുന്നതിനായി കിഫ്ബി വഴി അനുവദിച്ചതാണ്. ഈ പദ്ധതിയുടെ ആദ്യഘട്ടത്തില്‍ പഴശി ഇറിഗേഷന്‍ പദ്ധതിയുടെ സമീപം കിണറും വാട്ടര്‍ ട്രീറ്റ്‌മെന്‍റ് പ്ലാന്‍റും പൂര്‍ത്തിയായിട്ടുണ്ട്. രണ്ടു നഗരസഭകളിലും കുടിവെള്ളം വിതരണം ചെയ്യാനാവശ്യമായ ടാങ്കുകളുടെയും നിര്‍മാണം പൂര്‍ത്തിയായി. മട്ടന്നൂര്‍ നഗരസഭയില്‍ ജലവിതരണത്തിനുള്ള പൈപ്പ് ലൈന്‍ സ്ഥാപിക്കുന്നതിന് തുക അനുവദിക്കേണ്ടതുണ്ട്. ഇതിനായി 16 കോടി രൂപ പദ്ധതിയുടെ രണ്ടാംഘട്ടമെന്ന നിലയില്‍ അനുവദിക്കാന്‍ സര്‍ക്കാറിനോട് ആവശ്യപ്പെട്ടിട്ടുണ്ട്. ഒരുവര്‍ഷം കൊണ്ട് ഈ പ്രവൃത്തി പൂര്‍ത്തീകരിക്കാന്‍ കഴിയുമെന്നാണ് പ്രതീക്ഷ. പഞ്ചായത്തുകളില്‍ ജല്‍ജീവന്‍ മിഷന്‍ മുഖേനയാണ് കുടിവെള്ള വിതരണം ഉറപ്പാക്കുകയെന്നും കേന്ദ്ര-കേരള സര്‍ക്കാരുകളുടെ സംയുക്താഭിമുഖ്യത്തിലാണ് ഈ പദ്ധതി നടപ്പിലാക്കുന്നതെന്നും ജല്‍ജീവന്‍ പദ്ധതികള്‍ക്ക് അടിയന്തിരമായി ഭരണാനുമതി നല്‍കുന്നതിന് സര്‍ക്കാരിനോട് ആവശ്യപ്പെടുമെന്നും പദ്ധതി പൂര്‍ത്തിയാവുന്നതോടെ പഞ്ചായത്തുകളിലെ കുടിവെള്ള പ്രശ്‌നങ്ങള്‍ക്ക് പരിഹാരമാകുമെന്നും എംഎല്‍എ അറിയിച്ചു.
മട്ടന്നൂര്‍ മണ്ഡലത്തിലെ കുടിവെള്ള പ്രശ്‌നത്തിന് പരിഹാരമുണ്ടാക്കും: കെ.കെ.ശൈലജ
