കണ്ണൂർ: വോട്ടര്‍പട്ടിക പുതുക്കുന്നതിന് തെരഞ്ഞെടുപ്പ് കമ്മീഷന്‍ നടപടികള്‍ ആരംഭിച്ചു. 2022 ജനുവരി ഒന്നിന് 18 വയസ് പൂര്‍ത്തിയാക്കുന്ന ഇന്ത്യന്‍ പൗരന്‍മാര്‍ക്കാണ് പട്ടികയില്‍ ഉള്‍പ്പെടാന്‍ അര്‍ഹത. നിലവിലുള്ള പട്ടികയിലെ തെറ്റുകള്‍ തിരുത്തുക, ഇരട്ടിപ്പ് ഒഴിവാക്കുക, വിലാസത്തിലും മറ്റ് വ്യക്തി വിവരങ്ങളിലുമുളള തെറ്റുകള്‍ തിരുത്തുക തുടങ്ങിയ പ്രവര്‍ത്തനങ്ങള്‍ ഇതിനകം ആരംഭിച്ചു. ബൂത്ത് ലെവല്‍ ഓഫീസര്‍മാര്‍ വീടുകള്‍ സന്ദര്‍ശിച്ചാണ് തെറ്റുകള്‍ തിരുത്തി പട്ടിക ശുദ്ധീകരിക്കുന്ന പ്രക്രിയ നടത്തുക. ഒക്‌ടോബര്‍ 31നകം ഇത് പൂര്‍ത്തിയാക്കും. ഇതോടൊപ്പം ആവശ്യമെങ്കില്‍ പോളിംഗ് ബൂത്തുകള്‍ പുനര്‍വിന്യസിക്കുന്നതിനുള്ള നടപടികളും ഉണ്ടാകും. ഇലക്ടറല്‍ റോള്‍ ഓഫീസര്‍മാരായ തഹസില്‍ദാര്‍മാര്‍ക്കാണ് രാഷ്ട്രീയ പാര്‍ട്ടികള്‍ ഇതുസംബന്ധിച്ച നിര്‍ദേശങ്ങള്‍ സമര്‍പ്പിക്കേണ്ടത്. ഇക്കാര്യങ്ങള്‍ ചര്‍ച്ച ചെയ്യുന്നതിന് തഹസില്‍ദാര്‍മാര്‍ നിയമസഭാ മണ്ഡലാടിസ്ഥാനത്തില്‍ രാഷ്ട്രീയ പാര്‍ട്ടികളുടെ യോഗം വിളിച്ചു ചേര്‍ക്കുമെന്നും കളക്ടര്‍ അറിയിച്ചു. നവംബര്‍ ഒന്നിന് കരട് പട്ടിക പ്രസിദ്ധീകരിക്കും. നവംബര്‍ ഒന്ന് മുതല്‍ നവംബര്‍ 30 വരെ പുതിയ വോട്ടര്‍മാരെ ചേര്‍ക്കാനും അനര്‍ഹരെ ഒഴിവാക്കാനും അവസരമുണ്ടാകും. ആവശ്യമായ മാറ്റങ്ങളോടെ 2022 ജനുവരി അഞ്ചിന് അന്തിമ പട്ടിക പ്രസിദ്ധീകരിക്കും.
വോട്ടര്‍പട്ടിക: തെറ്റുകള്‍ തിരുത്താം
