കണ്ണൂർ: സ്‌കൂള്‍തലം മുതൽ സ്ത്രീധനത്തിനെതിരേ ബോധവത്കരണ പരിപാടികള്‍ നടത്തണമെന്ന് വനിതാ കമ്മീഷന്‍ അംഗം ഇ.എം. രാധ. കോളജുകളില്‍ നടത്തുന്ന ബോധവത്കരണ പരിപാടികളില്‍ വിദ്യാര്‍ഥികള്‍ക്കൊപ്പം അവരുടെ കുടുംബങ്ങളെയും ഉള്‍പ്പെടുത്തണമെന്നും കളക്ടറേറ്റ് കോണ്‍ഫറന്‍സ് ഹാളില്‍ നടന്ന വനിതാ കമ്മീഷന്‍ മെഗാ അദാലത്തില്‍ അവര്‍ അറിയിച്ചു. ഒറ്റയ്ക്ക് താമസിക്കുന്ന സ്ത്രീകളുടെ സ്വത്തുക്കള്‍ തട്ടിയെടുത്ത് അവരെ പുറന്തള്ളുന്ന സംഭവങ്ങള്‍ ഏറിവരികയാണ്. ഇത്തരം കേസുകളില്‍ കടുത്ത നടപടികള്‍ സ്വീകരിക്കും.
മെഗാ അദാലത്തില്‍ 70 പരാതികളാണ് ലഭിച്ചത്. ഇതില്‍ 22 പരാതികള്‍ തീര്‍പ്പാക്കി. 48 പരാതികള്‍ അടുത്ത അദാലത്തിലേക്ക് മാറ്റിവച്ചു. നാലു പരാതികളില്‍ കമ്മീഷന്‍ റിപ്പോര്‍ട്ട് തേടി. ജോലിയില്‍ നിന്ന് പിരിച്ചുവിട്ട രണ്ടു പരാതികളടക്കം സ്ത്രീകള്‍ക്കെതിരെയുള്ള അതിക്രമം, സ്വത്ത് തര്‍ക്കം എന്നിവയുമായി ബന്ധപ്പെട്ട പരാതികളാണ് കൂടുതലായും ലഭിച്ചത്. കളക്ടറേറ്റ് കോണ്‍ഫറന്‍സ് ഹാളില്‍ നടന്ന അദാലത്തില്‍ വനിതാ കമ്മീഷന്‍ അംഗം ഇ.എം. രാധ, ലീഗല്‍ പാനല്‍ അംഗങ്ങളായ അഡ്വ. വിമലകുമാരി, അഡ്വ. പത്മജ പത്മനാഭന്‍, അഡ്വ. കെ എം പ്രമീള, അഡ്വ. കെ പി ഷിമ്മി, വനിതാ സെല്‍ സിവില്‍ പോലീസ് ഓഫീസര്‍മാരായ കെ ദില്‍ന, എ അനിത തുടങ്ങിയവര്‍ പങ്കെടുത്തു.
സ്ത്രീധനം: സ്‌കൂള്‍തല ബോധവത്കരണം അനിവാര്യമെന്ന് വനിതാ കമ്മീഷന്‍
