കണ്ണൂർ: കോട്ടയം അതിരൂപതയുടെ സാമൂഹിക സേവനവിഭാഗമായ മലബാർ സോഷ്യൽ സർവീസ് സൊസൈറ്റി അതിരൂപതയുമായി സഹകരിച്ച് കോവിഡ് അതിജീവന പദ്ധതി നടപ്പാക്കുന്നു.
ഇതിന്റെ ഭാഗമായി രാജപുരം, മടന്പം, ചങ്ങിലേരി, പെരിക്കല്ലൂർ എന്നീ ഫൊറോനകളിലെ വിവിധ ഇടവകകളിൽ കോവിഡ് രോഗംമൂലം ദുരിതമനുഭവിക്കുന്ന കുടുംബങ്ങൾക്ക് നൽകുന്ന ചികിത്സാസഹായം, വിദ്യാഭ്യാസസഹായം, വരുമാനപദ്ധതി എന്നിവയുടെ മലബാർ റീജണൽതല ഉദ്ഘാടനം അതിരൂപത സഹായമെത്രാൻ മാർ ജോസഫ് പണ്ടാരശേരിൽ നിർവഹിച്ചു. ശ്രീപുരം ബറുമറിയം പാസ്റ്ററൽ സെന്റർ ഡയറക്ടർ റവ. ഡോ. ജോസ് നെടുങ്ങാട്ട്, മലബാർ സോഷ്യൽ സർവീസ് സൊസൈറ്റി സെക്രട്ടറി ഫാ.ബിബിൻ തോമസ് കണ്ടോത്ത്, ശ്രീപുരം ഇംഗ്ലീഷ് മീഡിയം സ്കൂൾ പ്രിൻസിപ്പൽ ഫാ. ലൂക്ക് കരിന്പിൽ, ഫാ. ലിജോ കൊച്ചുപറന്പിൽ, ഏബ്രഹാം ഉള്ളാടപ്പുള്ളിൽ എന്നിവർ പങ്കെടുത്തു. പദ്ധതിയുടെ ആദ്യഘട്ടമായി ചികിത്സാസഹായവും വിദ്യാഭ്യാസ സഹായവുമാണ് വിതരണം ചെയ്യുക.