കണ്ണൂർ: ജനങ്ങള്‍ക്ക് വാക്സിന് വ്യവസ്ഥാപിതമായി ലഭ്യമാക്കാന്‍ തദ്ദേശസ്ഥാപനങ്ങള്‍ ശ്രദ്ധിക്കണമെന്ന് തദ്ദേശ സ്വയംഭരണ മന്ത്രി എം.വി. ഗോവിന്ദന്‍. ജില്ലാ കളക്‌ടര്‍ ടി.വി. സുഭാഷിന്‍റെ അധ്യക്ഷതയില്‍ കളക്‌ടറേറ്റില്‍ നടന്ന ജില്ലാ വികസനസമിതി യോഗത്തില്‍ പ്രസംഗിക്കുകയായിരുന്നു അദ്ദേഹം.
വാക്സിന് വിതരണത്തില്‍ ഒരുതരത്തിലുമുള്ള സങ്കീര്‍ണതയോ ക്രമക്കേടോ ഉണ്ടാകരുത്. ഇതിനായി തദ്ദേശസ്ഥാപനങ്ങള്‍ ആരോഗ്യവകുപ്പുമായി ചേര്‍ന്നു പ്രവര്‍ത്തിക്കണം. ഗര്‍ഭിണികള്‍, പ്രായം കൂടിയവര്‍, വിദ്യാര്‍ഥികള്‍ എന്നിങ്ങനെ സര്‍ക്കാര്‍ മുന്‍ഗണനാപട്ടിക നിശ്ചയിച്ചിട്ടുണ്ട്. ഈ വിഭാഗങ്ങള്‍ക്ക് ആദ്യം വാക്സിന് നല്‍കണം.
ചിലയിടങ്ങളില്‍ കൂടുതല്‍ വാക്സിനേഷന്‍ നല്‍കിയെന്നത് വാര്‍ഡ് അംഗങ്ങളുടെ നേട്ടമായി അവതരിപ്പിക്കുന്ന പ്രവണത കാണുന്നുണ്ട്. ഇത് അഭിലഷണീയമല്ല. തെറ്റായി വ്യാഖ്യാനിക്കപ്പെടുന്നതിനാല്‍ ഇത്തരം പ്രവണത ഒഴിവാക്കണമെന്നും മന്ത്രി പറഞ്ഞു. തദ്ദേശസ്ഥാപന പരിധിയിലെ മുഴുവന്‍ പേര്‍ക്കും വാക്സിന് ഒരുപോലെ ലഭ്യമാക്കണം. ഓരോ ദിവസവും ആദ്യത്തെയും അവസാനത്തെയും വാര്‍ഡ് എന്ന ക്രമത്തില്‍ മാറിമാറി വരുന്നവിധം ക്രമീകരണം ഉണ്ടാക്കണം. കോവിഡ് കേസുകള്‍ കൂടിവരുന്ന സാഹചര്യത്തില്‍ അടുത്ത രണ്ടാഴ്ച അതീവ ജാഗ്രത പുലര്‍ത്തണം. തദ്ദേശസ്ഥാപനങ്ങളും ആരോഗ്യവകുപ്പും പോലീസും മറ്റു വകുപ്പുകളും പൊതുജനങ്ങളും ഒത്തു ശ്രമിച്ചാലേ വ്യാപനം പ്രതിരോധിക്കാനാകൂവെന്നും മന്ത്രി പറഞ്ഞു.
വാക്സിന് വിതരണം വ്യവസ്ഥാപിതമാക്കാന്‍ തദ്ദേശസ്ഥാപനങ്ങള്‍ ശ്രദ്ധിക്കണം: മന്ത്രി
