കണ്ണൂര്‍: കൊമ്മേരി ആടുവളര്‍ത്തുകേന്ദ്രത്തിലെ ജോണിസ് രോഗം ബാധിച്ച ആടുകളെ കൊല്ലില്ല. ആടുകളെ കൊല്ലണമെന്ന മൃഗസംരക്ഷണ വകുപ്പിന്‍െറ തീരുമാനം പുനഃപരിശോധിക്കണമെന്നാവശ്യപ്പെട്ട് കെ.കെ. ശൈലജ എം.എല്‍.എ, ജില്ല പഞ്ചായത്ത് പ്രസിഡന്‍റ് പി.പി. ദിവ്യ എന്നിവര്‍ മന്ത്രി ചിഞ്ചുറാണിക്ക് കത്തയച്ചിരുന്നു.
ഇതേതുടര്‍ന്ന് മന്ത്രിയുടെ അധ്യക്ഷതയില്‍ ചേര്‍ന്ന ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് ആടുകളെ കൊല്ലേണ്ടതില്ല എന്ന തീരുമാനം കൈക്കൊണ്ടത്. രോഗം പിടിപെടാത്ത ആടുകള്‍ക്ക് പ്രതിരോധ വാക്സിന്‍ നല്‍കുന്നതിന് നടപടികള്‍ കൈക്കൊള്ളണമെന്ന് കെ.കെ. ശൈലജ ആവശ്യപ്പെട്ടു.
ജോണിസ് ബാധിച്ച ആടുകളെ ചികിത്സിക്കുന്നതിന് ക്വാറന്‍റീന്‍ കേന്ദ്രം ഒരുക്കാമെന്ന് പി.പി. ദിവ്യയും ഉറപ്പുനല്‍കി. ഇതേതുടര്‍ന്നാണ് ആടുകളെ കൊല്ലേണ്ടതില്ലെന്ന തീരുമാനം എടുത്തത്. ഫാമിലെ രോഗം ബാധിച്ച 35ഓളം ആടുകളെ കൊല്ലാനായിരുന്നു നീക്കം.