കണ്ണൂർ: കച്ചവടക്കാര്‍, പൊതുഗതാഗതം, തൊഴിലുറപ്പ് മേഖലയിലെ തൊഴിലാളികള്‍ എന്നിങ്ങനെ പൊതുസമൂഹവുമായി നേരിട്ട് ഇടപഴകുന്നവര്‍ക്ക് കോവിഡ് വാക്‌സിന്‍ ലഭ്യമാക്കുന്നതിന് അവരെ ഉള്‍പ്പെടുത്തിക്കൊണ്ടുള്ള പ്രത്യേകം മുന്‍ഗണനാ പട്ടിക ഗ്രാമപഞ്ചായത്തുകളുടെ നേതൃത്വത്തില്‍ വാര്‍ഡ് തലത്തില്‍ തയാറാക്കും. ജില്ലയിലെ വാക്‌സിന്‍ വിതരണം ചിട്ടയോടെ നടപ്പാക്കുന്നതിനായി ജില്ലാ പഞ്ചായത്ത് പ്രസിഡന്‍റ് പി.പി. ദിവ്യയുടെ നേതൃത്വത്തില്‍ ചേര്‍ന്ന ഗ്രാമ പഞ്ചായത്ത് പ്രസിഡന്‍റുമാരുടെ യോഗത്തിലാണ് തീരുമാനം. സെക്കൻഡ് ഡോസ് വാക്‌സിന്‍ ലഭിക്കേണ്ടവരെയും മുന്‍ഗണനാ പട്ടികയില്‍ ഉള്‍പ്പെടുത്തും. ഇത്തരത്തില്‍ വാര്‍ഡ് തലത്തില്‍ തയാറാക്കി പഞ്ചായത്ത് അംഗീകരിച്ച മുന്‍ഗണനാ പട്ടികയുടെ അടിസ്ഥാനത്തില്‍ മാത്രമാകണം വാക്‌സിന്‍ നല്‍കേണ്ടത്. ഇതു കൂടാതെ പിന്നോക്ക മേഖലയിലുള്ളവര്‍ക്കും കൂടുതല്‍ പരിഗണന നല്‍കണമെന്നും ഗ്രാമപഞ്ചായത്തുകളിലെ ജനസംഖ്യാ ആനുപാതികമായി വാക്‌സിന്‍ ലഭ്യമാക്കണമെന്നും യോഗം ആവശ്യപ്പെട്ടു. ഡി കാറ്റഗറി തദ്ദേശ സ്ഥാപനങ്ങള്‍ പൂര്‍ണമായും അടച്ചിടാതെ കണ്ടെയ്ൻമെന്‍റ് സോണുകളാക്കി തിരിക്കുകയാണ് വേണ്ടതെന്ന അഭിപ്രായവും യോഗത്തില്‍ ഉയര്‍ന്നു.
സ്‌പോട്ട് വാക്‌സിനേഷന്‍ ലഭ്യമാക്കുന്ന സന്ദര്‍ഭങ്ങളില്‍ ആള്‍ക്കൂട്ടം ഒഴിവാക്കുന്നതിനായി വാര്‍ഡ് അടിസ്ഥാനത്തില്‍ സമയക്രമം നിശ്ചയിക്കണം. ആക്ഷേപരഹിതമായി വാക്‌സിന്‍ നല്‍കാന്‍ കഴിയണമെന്നും കൂടുതല്‍ വാക്‌സിന്‍ ആരോഗ്യ കേന്ദ്രങ്ങളില്‍ എത്തിക്കാന്‍ ആരോഗ്യപ്രവര്‍ത്തകര്‍ ശ്രദ്ധിക്കണമെന്നും വാക്‌സിന്‍ ഏറ്റവും ആവശ്യമുള്ള വിഭാഗങ്ങള്‍ക്ക് മുന്‍ഗണന നല്‍കണമെന്നും യോഗം ആവശ്യപ്പെട്ടു. ഓണ്‍ലൈനായി നടന്നയോഗത്തില്‍ ഡിപിഎം ഡോ. പി.കെ. അനില്‍കുമാര്‍, ആര്‍സിഎച്ച് ഓഫീസര്‍ ഡോ. ബി. സന്തോഷ്, ഡിഡിപി ടി.ജെ. അരുണ്‍ തുടങ്ങിയവര്‍ പങ്കെടുത്തു.
വാക്‌സിനേഷന്‍; വാര്‍ഡുതല മുന്‍ഗണനാ പട്ടിക തയാറാക്കും
