സംസ്ഥാനത്തെ പാര്ശ്വവത്കരിക്കപ്പെട്ട ജനവിഭാഗങ്ങളുടെ വാക്സിനേഷന് രജിസ്ട്രേഷനായി വേവ്: ’വാക്സിന് സമത്വത്തിനായി മുന്നേറാം’(WAVE: Work Along for Vaccine Equity) എന്ന പേരില് വാക്സിനേഷന് രജിസ്ട്രേഷന് കാമ്പയിന് അനുമതി നല്കി ഉത്തരവ് പുറപ്പെടുവിച്ചതായി ആരോഗ്യ മന്ത്രി വീണാ ജോര്ജ് അറിയിച്ചു. സ്വന്തമായി രജിസ്റ്റര് ചെയ്യാന് അറിയാത്തവരും സൗകര്യമില്ലാത്തവരുമായ ബിപിഎല്. വിഭാഗത്തില്പ്പെട്ടവരെ വാക്സിനേഷന്റെ ഭാഗമാക്കി മാറ്റാനാണു പദ്ധതി.
വാര്ഡ് തലത്തിലായിരിക്കും രജിസ്ട്രേഷന് പ്രക്രിയ. 31നകം ഇത്തരക്കാരുടെ രജിസ്ട്രേഷന് പൂര്ത്തിയാക്കേണ്ടതാണ്. ഓരോ പഞ്ചായത്തിലും ഓരോ ആശാവര്ക്കര്മാര് ഉള്ളതിനാല് ആ പ്രദേശത്ത് വാക്സിന് കിട്ടാതെ പോയ ആള്ക്കാരെ കണ്ടെത്തിയാണു രജിസ്ട്രേഷന് നടത്തുന്നത്. ആ വാര്ഡില് വാക്സിനെടുക്കാത്ത 18 വയസിന് മുകളിലുള്ള എല്ലാവരും രജിസ്റ്റര് ചെയ്തിട്ടുണ്ടെന്ന് ആശാ വര്ക്കര്മാര് ഉറപ്പ് വരുത്തും. ഇതുകൂടാതെ സ്മാര്ട് ഫോണുള്ള വ്യക്തികളെ സ്വയം രജിസ്റ്റര് ചെയ്യാന് ആശാവര്ക്കര്മാര് പ്രോത്സാഹിപ്പിക്കും. കോവിഡ് പ്രോട്ടോകോള് പാലിച്ചായിരിക്കും ആശാവര്ക്കര്മാര് വീട്ടില് സന്ദര്ശനം നടത്തി രജിസ്റ്റര് ചെയ്യിപ്പിക്കേണ്ടത്. കോവിനില് എങ്ങനെ രജിസ്റ്റര് ചെയ്യാമെന്ന് കാണിക്കുന്ന ഒരു വീഡിയോ തയ്യാറാക്കി സോഷ്യല് മീഡിയ വഴി പ്രചരിപ്പിക്കുന്നതാണ്.