കണ്ണൂര്‍: കോവിഡ് പ്രതിരോധ പ്രവര്‍ത്തനങ്ങളുടെ ഭാഗമായി കോര്പറേഷന് 25 ഓക്‌സിജന്‍ കോണ്‍സെന്‍ട്രേറ്ററുകള്‍ കൂടി പുതുതായി ലഭിച്ചു. ഡല്‍ഹി ആസ്ഥാനമായി പ്രവര്‍ത്തിക്കുന്ന ദക്ഷിണേഷ്യയിലെ പരിസ്ഥിതി സേവന രംഗത്തെ മുന്‍നിര സ്ഥാപനമായ ബ്ലൂ പ്ലാനറ്റ് എന്‍വയോണ്‍മെന്‍റ് സൊലൂഷന്‍സാണ് മേയറുടെ അഭ്യർഥന പ്രകാരം 25 ഓക്‌സിജന്‍ കോണ്‍സെന്‍ട്രേറ്ററുകള്‍ കൈമാറിയത്. കൗണ്‍സില്‍ ഹാളില്‍ നടന്ന ചടങ്ങില്‍ കമ്പനിയുടെ പ്രതിനിധി വിനോദ് തോമസ് മേയര്‍ ടി.ഒ.മോഹനന് കോണ്‍സെന്‍ട്രേറ്റുകള്‍ കൈമാറി. ഡെപ്യൂട്ടി മേയര്‍ കെ. ശബീന, സ്ഥിരം സമിതി അധ്യക്ഷന്‍മാരായ മാര്‍ട്ടിന്‍ ജോര്‍ജ്, സുരേഷ് ബാബു എളയാവൂര്‍, ഷമീമ, കൗണ്‍സിലര്‍മാരായ കെ.പി. അബ്ദുൾ റസാഖ്, ടി. രവീന്ദ്രന്‍, കൂക്കിരി രാജേഷ്, കെ.പി. ജയസൂര്യന്‍, കെ. സുരേഷ്, സെക്രട്ടറി ഡി. സാജു എന്നിവര്‍ പങ്കെടുത്തു.
ജില്ലയിലെ പ്രവാസികളുടെ കൂട്ടായ്മ പത്തും കേരള സ്റ്റേറ്റ് സര്‍വീസ് പെന്‍ഷനേഴ്‌സ് അസോസിയേഷന്‍ ഒരും ഓക്‌സിജന്‍ കോണ്‍സെന്‍ട്രേറ്ററും കഴിഞ്ഞ ദിവസം നല്‍കിയിരുന്നു. ഓക്‌സിജന്‍ കോണ്‍സെന്‍ട്രേറ്ററുകളില്‍ ഏറ്റവും മെച്ചപ്പെട്ട 10 ലിറ്റര്‍ കപ്പാസിറ്റിയുള്ള കോണ്‍സെന്‍ട്രേറ്ററുകളാണ് ഇപ്പോള്‍ ലഭിച്ചത്. 36 ഓക്‌സിജന്‍ കോണ്‍സെന്‍ട്രേറ്ററുകള്‍ കൈവശം ലഭിച്ചതോടെ ഏറ്റവും കൂടുതല്‍ ഓക്‌സിജന്‍ കോണ്‍സെന്‍ട്രേറ്ററുകള്‍ സ്വന്തമായുള്ള തദ്ദേശ സ്വയംഭരണ സ്ഥാപനമായി കണ്ണൂര്‍ കോര്പറേഷന് മാറിയെന്ന് മേയര്‍ പറഞ്ഞു.
ഓക്‌സിജന്‍ കോണ്‍സെന്‍ട്രേറ്ററുകള്‍ സുലഭമാകുന്നതോടെ അത്യാവശ്യ രോഗികള്‍ക്ക് ഓക്‌സിജന്‍ സിലിണ്ടര്‍ വീട്ടിലെത്തിക്കുന്നതിനും നിറച്ചു വീണ്ടും ഉപയോഗിക്കുന്നതിലെ ബുദ്ധിമുട്ട് ഒഴിവാകും. ഇവ കോര്‍പറേഷനു കീഴിലുള്ള പിഎച്ച്‌സികള്‍ക്കും മറ്റ് ആരോഗ്യ സ്ഥാപനങ്ങള്‍ക്കും നല്‍കി അത്യാവശ്യ രോഗികള്‍ക്ക് വീടുകളിലെത്തിച്ചു സൗജന്യ സേവനം നല്‍കുന്ന കാര്യം കോര്പറേഷന് ആലോചിച്ചു നടപ്പാക്കുമെന്ന് മേയര്‍ പറഞ്ഞു.
കണ്ണൂര്‍ കോര്പറേഷന് 25 ഓക്‌സിജന്‍ കോണ്‍സെന്‍ട്രേറ്ററുകള്‍ നൽകി
