കണ്ണൂര്‍: കോവിഡ് വ്യാപന പശ്ചാത്തലത്തില്‍ ജില്ലയിലെ കിടപ്പ് രോഗികള്‍ക്കായി ജില്ലാ പഞ്ചായത്ത് ഏര്‍പ്പെടുത്തിയ വാക്‌സിനേഷനുമായി ബന്ധപ്പെട്ട നടപടിക്രമങ്ങള്‍ വേഗത്തിലാക്കാന്‍ തദ്ദേശ സ്ഥാപനങ്ങള്‍ക്ക് ജില്ലാ പഞ്ചായത്ത് പ്രസിഡന്‍റ് പി.പി. ദിവ്യ നിര്‍ദേശം നല്‍കി.
മൊബൈല്‍ വാക്സിനേഷന് വാഹനം സഞ്ചരിക്കുന്നതിന് ഭൂപ്രകൃതി അനുസരിച്ചുള്ള റൂട്ട് മാപ്പ്, ആവശ്യമായ വാഹനങ്ങള്‍, വാക്സിനേഷന് ടീം എന്നിവ ഓരോ തദ്ദേശസ്ഥാപനവും ഒരുക്കണം. ഇവ ഇനിയും തയാര്‍ ചെയ്തിട്ടില്ലാത്ത തദ്ദേശ സ്ഥാപനങ്ങള്‍ അവ എത്രയും വേഗം ഒരുക്കണമെന്നും ജില്ലാ പഞ്ചായത്ത് പ്രസിഡന്‍റ് അറിയിച്ചു. വാക്‌സിന്‍ വിതരണത്തിന്‍റെ പുരോഗതി വിലയിരുത്തുന്നതിനായി തദ്ദേശ സ്ഥാപന അധ്യക്ഷന്‍മാരെ പങ്കെടുപ്പിച്ച് നടത്തിയ ഓണ്‍ലൈന്‍ യോഗത്തിലാണ് നിര്‍ദേശം നല്‍കിയത്.
പൂര്‍ണമായും കിടപ്പിലായ രോഗികള്‍ക്കാണ് വാക്സിനേഷന് മുന്‍ഗണന നല്‍കി വരുന്നത്. ഇത്തരത്തിലുള്ള 4458 രോഗികള്‍ ജില്ലയിലുണ്ടെന്നാണ് കണക്ക്. ലഭ്യതയ്ക്കനുസരിച്ച് ഇവര്‍ക്ക് വാക്‌സിന്‍ ലഭ്യമാക്കും. കിടപ്പുരോഗികളെ എളുപ്പത്തില്‍ എത്തിക്കാന്‍ കഴിയുന്ന സ്ഥലങ്ങള്‍ കേന്ദ്രീകരിച്ചാണ് മൊബൈല്‍ യൂണിറ്റ് വാക്സിനേഷന് നല്‍കുക. തീരെ അവശത അനുഭവിക്കുന്നവരും വാക്സിനേഷന് കേന്ദ്രത്തിലേക്ക് കൊണ്ടുവരാന്‍ പ്രയാസമുള്ളവരുമായ രോഗികള്‍ക്ക് മാത്രം വീടുകളില്‍ ചെന്ന് വാക്‌സിന്‍ നല്‍കും. പട്ടിക വര്‍ഗ മേഖലയില്‍ വാക്‌സിന്‍ ലഭ്യമാക്കാന്‍ പ്രത്യേകം ശ്രദ്ധ ചെലുത്തണമെന്നും ജില്ലാ പഞ്ചായത്ത് പ്രസിഡന്‍റ് യോഗത്തില്‍ അറിയിച്ചു.
വിവിധ ഗ്രാമപഞ്ചായത്ത് പ്രസിഡന്‍റുമാര്‍, മറ്റ് പ്രതിനിധികള്‍, ജില്ലാ പഞ്ചായത്ത് സെക്രട്ടറി വി. ചന്ദ്രന്‍, ഡിപിഎം ഡോ. അനില്‍ കുമാര്‍ തുടങ്ങിയവര്‍ പങ്കെടുത്തു.
കിടപ്പുരോഗികള്‍ക്കുള്ള വാക്സിനേഷന്: നടപടികള്‍ വേഗത്തിലാക്കാന്‍ നിര്‍ദേശം
