ഇരിട്ടി: ലോക്ക് ഡൗണിനിടെ കേരള -കര്ണാടക അതിര്ത്തിയിയായ മാക്കൂട്ടത്തും പരിശോധന ശക്തം. കര്ണാടകത്തിലേക്ക് ചരക്കു വാഹനങ്ങള്ക്കു മാത്രമാണ് അനുമതി. കര്ണാടകയില് രണ്ടാഴ്ച സമ്പൂര്ണ ലോക്ക് ഡൗണ് പ്രഖ്യാപിച്ചതോടെ കേരള -കര്ണാടക അതിര്ത്തിയായ മാക്കൂട്ടത്തും കര്ശന നിയന്ത്രണമാണ് ഏര്പ്പെടുത്തിയത്. മരണം, വിവാഹം തുടങ്ങിയ ആവശ്യങ്ങള്ക്ക് കര്ണാടക അധികൃതരുടെ അനുമതി വേണം. കേരളത്തില് നിന്ന് കര്ണാടകയില് എത്തുന്നവര്ക്ക് 14 ദിവസം നിരീക്ഷണവും ഏര്പ്പെടുത്തിയിട്ടുണ്ട്.
ചരക്ക് വാഹനങ്ങളില് പോകുന്ന ഡ്രൈവര്മാര്ക്ക് നേരത്തെ ഉള്ളതുപോലെ കോവിഡ് നെഗറ്റീവ് ആര്ടിപിസിആര് പരിശോധന സര്ട്ടിഫിക്കറ്റ് നിര്ബന്ധമാണ്. പോലീസും റവന്യൂ, ആരോഗ്യവകുപ്പ് ഉദ്യോഗസ്ഥരുമാണ് മാക്കൂട്ടം ഫോറസ്റ്റ് ചെക്ക് പോസ്റ്റിന് സമീപത്തായി 24 മണിക്കൂറും വാഹന പരിശോധന നടത്തുന്നത്. കഴിഞ്ഞ ദിവസം മുതല് കര്ണാടകത്തില് ലോക്ക്ഡൗണ് പ്രഖ്യാപിച്ചതിനാല് ബംഗളൂരു, മൈസൂരു തുടങ്ങിയ സ്ഥലങ്ങളില് നിന്ന് കേരളത്തിലേക്ക് നിരവധി ആളുകളാണ് എത്തിയത്. കുടക് ജില്ലയില് ഉള്പ്പെടെ കോവിഡ് വ്യാപനം അതിരൂക്ഷമാണ്.