മട്ടന്നൂർ: നടുവനാട് മിനി സ്റ്റേഡിയത്തിൽ പ്ലാസ്റ്റിക് മാലിന്യം ശേഖരിച്ചു വയ്ക്കുന്നതിനെതിരെ പ്രതിഷേധവുമായി നാട്ടുകാർ രംഗത്ത്. കളിസ്ഥലത്ത് മാലിന്യം കൂട്ടിയിടുന്നതിനെതിരെയാണ് പ്രതിഷേധവുമായി നാട്ടുകാരെത്തിയത്. ഇരിട്ടി നഗരസഭയിലെ വാർഡുകളിൽ നിന്നും ഹരിത കർമസേന ശേഖരിക്കുന്ന പ്ലാസ്റ്റിക് മാലിന്യമാണ് സ്റ്റേഡിയത്തിൽ കൂട്ടിയിട്ടത്. ഇന്നലെ പ്ലാസ്റ്റിക് മാലിന്യവുമായെത്തിയ ലോറിയിൽ നിന്നും മാലിന്യം ഇറക്കാൻ അനുവദിക്കാതിരിക്കുകയായിരുന്നു. പ്ലാസ്റ്റിക് മാലിന്യം നായകൾ ഉൾപ്പെടെ കടിച്ചുവലിച്ചുകൊണ്ടുപോയി പ്രദേശത്തിടുന്നതാണ് ജനങ്ങളുടെ പ്രതിഷേധത്തിനിടയാക്കിയത്. പിന്നീട് നഗരസഭ ചെയർപേഴ്സൺ കെ.ശ്രീലതയും വൈസ് ചെയർമാൻ പി.പി. ഉസ്മാനും കൗൺസിലർമാരുമെത്തി നാട്ടുകാരോട് സംസാരിക്കുകയും പ്ലാസ്റ്റിക് മാലിന്യങ്ങൾ മലപ്പുറത്തേക്ക് കയറ്റി കൊണ്ടുപോകാൻ ഇന്നു ലോറിയെത്തുമെന്നും പറയുകയായിരുന്നു. ഇതേത്തുടർന്നു ലോറിയിൽ കൊണ്ടുവന്ന മാലിന്യം സ്റ്റേഡിയത്തിൽ ഇറക്കാൻ അനുവദിക്കുകയായിരുന്നു.
previous post