കണ്ണൂർ: ജൈവവിഭവങ്ങള്‍ക്കും കാര്‍ഷിക ഗവേഷണത്തിനുമായി കൂത്തുപറമ്പില്‍ ഒരുങ്ങുന്ന കേന്ദ്രത്തിന്‍റെ അക്കാദമിക് സമുച്ചയങ്ങളുടെ ഉദ്ഘാടനം നാളെ വൈകുന്നേരം നാലിന് മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിക്കും. മന്ത്രി കെ.കെ. ശൈലജ അധ്യക്ഷത വഹിക്കും. സെന്‍റര്‍ ഫോര്‍ ബയോ റിസോഴ്‌സ് ആൻഡ് അഗ്രിക്കള്‍ച്ചറല്‍ റിസര്‍ച്ച് ഹോസ്റ്റല്‍ സമുച്ചയങ്ങളുടെ ഉദ്ഘാടനം മന്ത്രി വി.എസ്. സുനില്‍ കുമാര്‍ ഓണ്‍ലൈനായി നിര്‍വഹിക്കും. എംപിമാരായ കെ. മുരളീധരന്‍, കെ.കെ. രാഗേഷ്, കാര്‍ഷിക ഉത്പാദന കമ്മീഷണര്‍ ഇഷിത റോയ്, കൃഷി വകുപ്പ് ഡയറക്‌ടര്‍ കെ.വാസുകി എന്നിവര്‍ പങ്കെടുക്കും.
കൃഷി, മൃഗസംരക്ഷണം, ഫിഷറീസ് രംഗങ്ങളില്‍ തൊഴിലധിഷ്ഠിത സര്‍ട്ടിഫിക്കറ്റ് ഡിപ്ലോമ കോഴ്‌സുകള്‍, ഈ വിഷയങ്ങള്‍ ഓപ്ഷണലായ ഇന്‍റഗ്രേറ്റഡ് ഡിഗ്രി കോഴ്‌സുകള്‍, വിദേശ സര്‍വകലാശാലകളുമായി സഹകരിച്ചുള്ള വിദൂരവിദ്യാഭ്യാസ കോഴ്‌സുകള്‍, എക്സ്റ്റന്‍ഷന്‍ സംരംഭകര്‍ക്കുള്ള ഇന്‍കുബേന്‍ സെന്‍റര്‍, കര്‍ഷകര്‍ക്ക് പ്രായോഗിക പരിശീലനകേന്ദ്രങ്ങള്‍, പ്രോജക്ട് റിപ്പോര്‍ട്ടുകള്‍ തയാറാക്കി നല്‍കുന്ന സഹായകേന്ദ്രം, വിദേശ സര്‍വകലാശാലകളും കേന്ദ്ര ഇന്‍സ്റ്റിറ്റ്യൂട്ടുകളുമായി സഹകരിച്ച് കൃഷി, മൃഗസംരക്ഷണം, ഫിഷറീസ് രംഗത്തെ തനതായ അറിവുകള്‍ ബ്രീഡുകള്‍, സസ്യജാലങ്ങള്‍ എന്നിവയിലുള്ള ഗവേഷണം എന്നിവ ഇനി ഒരു കുടക്കീഴില്‍ സാധ്യമാകും.