സംസ്ഥാനത്ത് വിവിധ വകുപ്പുകളിലായി 3051 തസ്തികകൾ സൃഷ്ടിക്കും: മുഖ്യമന്ത്രി

സംസ്ഥാനത്ത് വിവിധ വകുപ്പുകളിലായി 3051 തസ്തികകൾ സൃഷ്ടിക്കാൻ മന്ത്രിസഭായോഗം തീരുമാനിച്ചതായി മുഖ്യമന്ത്രി പിണറായി വിജയൻ വാർത്താസമ്മേളനത്തിൽ അറിയിച്ചു. ഇതോടെ ഈ സർക്കാർ സൃഷ്ടിച്ച പുതിയ സ്ഥിരം തസ്തികകളുടെ എണ്ണം മുപ്പതിനായിരം കടന്നു. താൽക്കാലികമടക്കം അത് അരലക്ഷത്തോളമാണ്.
ആരോഗ്യവകുപ്പിൽ 2027 തസ്തികകൾ സൃഷ്ടിക്കാൻ തീരുമാനിച്ചു. ഇതിൽ 1200 തസ്തികകൾ ആരോഗ്യവകുപ്പ് ഡയറക്ടറുടെ കീഴിലും 527 എണ്ണം മെഡിക്കൽ വിദ്യാഭ്യാസ ഡയറക്ടറുടെ കീഴിലും 300 തസ്തികകൾ ആയൂഷ് വകുപ്പിനു കീഴിലുമാണ്. ഇതിനുപുറമെ മലബാർ കാൻസർ സെന്ററിന്റെ പ്രവർത്തനത്തിന് 33 തസ്തികകൾ സൃഷ്ടിക്കും. പുനലൂർ താലൂക്ക് ആശുപത്രിയുടെ പ്രവർത്തനം മെച്ചപ്പെടുത്തുന്നതിന് 17 തസ്തികകളും സൃഷ്ടിക്കും. തിരുവനന്തപുരം മെഡിക്കൽ കോളേജിലെ എസ്.എ.ടി ആശുപത്രിയിൽ പീഡിയാട്രിക് ഗാസ്‌ട്രോ എന്ററോളജി യൂണിറ്റ് ആരംഭിക്കും. ഇതിനായി അഞ്ച് തസ്തികകൾ സൃഷ്ടിക്കും.
35 എയ്ഡഡ് ഹയർ സെക്കന്ററി സ്‌കൂളുകൾക്ക് വേണ്ടി 151 തസ്തികകൾ പുതുതായി സൃഷ്ടിക്കും. ഇതിനു പുറമെ 24 എച്ച്എസ്എസ്ടി ജൂനിയർ തസ്തികകൾ അപ്‌ഗ്രേഡ് ചെയ്യും. തിരുവനന്തപുരം, വിയ്യൂർ, കണ്ണൂർ എന്നീ സെൻട്രൽ ജയിലുകളിൽ ക്ലിനിക്കൽ സൈക്കോളജിസ്റ്റിന്റെ ഓരോ തസ്തിക സൃഷ്ടിക്കും. 250 തടവുകാർ വരെയുള്ള ജയിലുകളിൽ കൗൺസലറുടെ ഒരു തസ്തികയും (പരമാവധി 5 തസ്തിക) സൃഷ്ടിക്കും. പുതുതായി പ്രവർത്തനം ആരംഭിക്കുന്ന തവനൂർ സെൻട്രൽ ജയിലിന്റെ പ്രവർത്തനത്തിന് 161 തസ്തികകൾ സൃഷ്ടിക്കും. സെന്റർ ഫോർ കണ്ടിന്യൂയിംഗ് എജുക്കേഷനിൽ 22 തസ്തികകൾ, വിവിധ അറബിക് എയ്ഡഡ് കോളേജുകളിൽ 54 അധ്യാപക തസ്തികകൾ, സർക്കാർ സംഗീത കോളേജുകളിൽ 14 ജൂനിയർ ലക്ചറർ, 3 ലക്ചറർ തസ്തികകൾ, തൃശൂർ ജില്ലയിലെ മണ്ണുത്തി സ്റ്റേറ്റ് ബയോ കൺട്രോൾ ലാബ് പ്രവർത്തനത്തിന് 9 സ്ഥിരം തൊഴിലാളികളുടെ തസ്തികയും സൃഷ്ടിക്കും.
കേരള യൂണിവേഴ്‌സിറ്റി ഓഫ് ഫിഷറീസ് ആൻഡ് ഓഷ്യൻ സ്റ്റഡീസിൽ  30 അനധ്യാപക തസ്തികകൾ സൃഷ്ടിക്കും. ഇതിൽ 24 എണ്ണം പുതിയ തസ്തികകളാണ്. 6 തസ്തികകൾ റീ-ഡെസിഗ്നേറ്റ് ചെയ്യും. കോഴിക്കോട് ഗവൺമെന്റ് ഫിസിക്കൽ എഡ്യുക്കേഷൻ കോളേജിൽ ഏഴ് അസിസ്റ്റന്റ് പ്രൊഫസർ തസ്തികയും പുതുതായി ആരംഭിച്ച 28 സർക്കാർ ആർട്‌സ് ആൻഡ് സയൻസ് കോളേജുകളിൽ 100 അനധ്യാപക തസ്തികകളും സൃഷ്ടിക്കും.
അഗ്നിരക്ഷാ വകുപ്പിനു കീഴിൽ താനൂർ, പട്ടാമ്പി, കോങ്ങാട്, കൊല്ലങ്കോട്, കല്ലമ്പലം എന്നിവിടങ്ങളിൽ പുതിയ ഫയർ സ്റ്റേഷനുകൾ ആരംഭിക്കുന്നതിന് 65 തസ്തികകൾ സൃഷ്ടിക്കും. ഉള്ളൂർ, മാവൂർ, ചീമേനി, പനമരം, വൈത്തിരി, രാജാക്കാട്, ആറൻമുള, പാലോട്, നേര്യമംഗലം എന്നിവിടങ്ങളിൽ ഫയർ സ്റ്റേഷൻ ആരംഭിക്കുന്നതിന് തത്വത്തിൽ അനുമതി നൽകും.
മികച്ച കായിക താരങ്ങൾക്ക് സർക്കാർ സർവീസിൽ നിയമനം നൽകുന്നതിനുള്ള പദ്ധതി പ്രകാരം 249 ഒഴിവുകളിലേക്ക് നിയമനത്തിന് അപേക്ഷ ക്ഷണിക്കാൻ തീരുമാനിച്ചു. കോഴിക്കോട് കോർപ്പറേഷനിൽ രണ്ടാം ഗ്രേഡ് ജൂനിയർ ഹെൽത്ത് ഇൻസ്‌പെക്ടർമാരുടെ 20 തസ്തികകൾ സൃഷ്ടിക്കും. കോടതി ഭാഷ മലയാളമാക്കുന്നതിന് മുൻസിഫ് മജിസ്‌ട്രേറ്റ് കോടതികളിൽ മലയാളം പരിഭാഷകരുടെ 50 തസ്തികകൾ സൃഷ്ടിക്കും. അഹാഡ്‌സ് നിർത്തലാക്കുന്നതുവരെ ജോലിയിൽ തുടർന്ന ആദിവാസി വിഭാഗത്തിൽപ്പെട്ട 32 സാക്ഷരതാ ഇൻസ്ട്രക്ടർമാർക്ക് അവരുടെ യോഗ്യതയ്ക്കനുസരിച്ച് സൂപ്പർന്യൂമററി തസ്തികകൾ സൃഷ്ടിച്ച് വനം വകുപ്പിലും തദ്ദേശസ്വയംഭരണ വകുപ്പിലും നിയമനം നൽകുമെന്ന് മുഖ്യമന്ത്രി പറഞ്ഞു.