കണ്ണൂർ: സംസ്ഥാന ക്ഷേത്രകല അക്കാദമി പുരസ്‌കാരങ്ങള്‍ പ്രഖ്യാപിച്ചു. ക്ഷേത്ര കലാശ്രീ പുരസ്‌കാരത്തിന് മേതില്‍ ദേവിക അര്‍ഹയായി. മോഹിനിയാട്ടത്തിനു നല്‍കിയ സമഗ്ര സംഭാവന പരിഗണിച്ചാണ് പുരസ്‌കാരം. 25,001 രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്‌കാരം.
ക്ഷേത്രകലാ ഫെലോഷിപ്പിനു ഗുരു സദനം ബാലകൃഷ്ണന്‍ അര്‍ഹനായി. കഥകളി രംഗത്തെ സമഗ്ര സംഭാവന പരിഗണിച്ചാണ് പുരസ്‌കാരം. 15,001 രൂപയും പ്രശസ്തിപത്രവും ഫലകവുമടങ്ങുന്നതാണു പുരസ്‌കാരം. പത്രസമ്മേളനത്തില്‍ ക്ഷേത്രകല അക്കാദമി ചെയര്‍മാന്‍ ഡോ. കെ.എച്ച്. സുബ്രഹ്മണ്യന്‍, സെക്രട്ടറി കൃഷ്ണന്‍ നടുവലത്ത് എന്നിവരാണ് പുരസ്‌കാരം പ്രഖ്യാപിച്ചത്. 2019, 2020 എന്നീ വര്‍ഷങ്ങളിലെ ക്ഷേത്രകല അവാര്‍ഡുകളുടെ വിതരണം 23ന് ടി.വി. രാജേഷ് എംഎല്‍എയുടെ അധ്യക്ഷതയില്‍ നടക്കുന്ന ചടങ്ങിൽ ദേവസ്വം മന്ത്രി കടകംപള്ളി സുരേന്ദ്രന്‍ നിര്‍വഹിക്കും.
ക്ഷേത്രകല അവാര്‍ഡ്, ഗുരുപൂജ പുരസ്‌കാരം, യുവപ്രതിഭ പുരസ്‌കാരം എന്നിവയ്ക്ക് അര്‍ഹരായവര്‍ക്ക് 7500 രൂപയും പ്രശസ്തിപത്രവും ഫലകവുമാണ് ലഭിക്കുക. പുരസ്‌കാര വിഭാഗം, ജേതാവ്, സ്ഥലം (ബ്രാക്കറ്റില്‍)എന്നീ ക്രമത്തില്‍ ചുവടെ:.
ദാരുശില്പം- സി.ബിജു ( കാസര്‍ഗോഡ്), ലോഹ ശില്പം- ടി.വി. രാജേന്ദ്രന്‍ (കണ്ണൂര്‍), ശിലാശില്പം – പി.വി. മനോജ്കുമാര്‍ (കണ്ണൂര്‍), ചെങ്കല്‍ ശില്പം – കണ്ടന്‍ചിറക്കല്‍ സുരേശന്‍ (കണ്ണൂര്‍), യക്ഷഗാനം – എം. ശങ്കര റൈ (കാസര്‍ഗോഡ്), മോഹിനിയാട്ടം – കലാമണ്ഡലം ഷീബ കൃഷ്ണകുമാര്‍ (കണ്ണൂര്‍), ചുമര്‍ചിത്രം-കെ.ആര്‍. ബാബു (കോഴിക്കോട്), തിടമ്പുനൃത്തം-ഡോ. ശ്രീരാമ അഗിത്തായ (കാസര്‍ഗോഡ്), കളമെഴുത്ത്-കെ. എസ്. മണികണ്ഠന്‍ (തൃശൂര്‍), കഥകളി-കോട്ടക്കല്‍ രാജ്‌മോഹന്‍ (മലപ്പുറം), കൃഷ്ണനാട്ടം-കെ. വൈശാഖ് ഗുരുവായൂര്‍ (തൃശൂര്‍), തീയാടിക്കൂത്ത്-വരവൂര്‍ തീയാടി നാരായണന്‍ നമ്പ്യാര്‍ (തൃശൂര്‍), ഓട്ടന്‍തുള്ളല്‍-കലാമണ്ഡലം വാസുദേവന്‍(പാലക്കാട്), ക്ഷേത്രവാദ്യം-കടന്നപ്പള്ളി ശങ്കരന്‍കുട്ടി മാരാര്‍ (കണ്ണൂര്‍), സോപാനസംഗീതം-എസ്. സുരേന്ദ്രന്‍ (ആലപ്പുഴ), അക്ഷരശ്ലോകം -വേലൂര്‍ പരമേശ്വരന്‍ നമ്പൂതിരി (ആലപ്പുഴ), ക്ഷേത്ര വൈജ്ഞാനിക സാഹിത്യം-ഡോ. കെ.ജി. പൗലോസ് (എറണാകുളം), ചാക്യാര്‍കൂത്ത്-ഡോ. എടനാട് രാജന്‍ നമ്പ്യാര്‍ (എറണാകുളം), നങ്ങ്യാര്‍കൂത്ത് -കലാമണ്ഡലം കൃഷ്‌ണേന്ദു (പാലക്കാട്), കൂടിയാട്ടം -പൊതിയില്‍ നാരായണ ചാക്യാര്‍ (പാലക്കാട്), പാഠകം -കലാമണ്ഡലം അബിജോഷ് (പാലക്കാട്), ശാസ്ത്രീയ സംഗീതം-താമരശേരി ഈശ്വരന്‍ ഭട്ടതിരി (കണ്ണൂര്‍).
ഗുരുപൂജ പുരസ്‌കാരം
തിടമ്പുനൃത്തം-ബാലന്‍ കാരണവര്‍ (കാനം, പയ്യന്നൂര്‍), യുവപ്രതിഭ പുരസ്‌കാരം കൂടിയാട്ടം-അമ്മൂര്‍ രജനീഷ് ചാക്യാര്‍(തൃശൂര്‍), ലോഹശില്പം -ചിത്രന്‍ കുഞ്ഞിമംഗലം (കണ്ണൂര്‍), ചുമര്‍ചിത്രം -ശാസ്ത്രശര്‍മന്‍ ടി.എസ്. പ്രസാദ് (തൃശൂര്‍), മോഹിനിയാട്ടം- ഹരിത തമ്പാന്‍(കണ്ണൂര്‍).