കണ്ണൂർ: രണ്ടാംഘട്ട കോവിഡ് വാക്‌സിനേഷന്‍റെ ഭാഗമായി ജില്ലയില്‍ ഇന്നലെ 1597 പേര്‍ക്ക് ആദ്യ ഡോസ് പ്രതിരോധ കുത്തിവയ്പ് നല്‍കി. ആദ്യഘട്ടത്തില്‍ ആരോഗ്യ പ്രവര്‍ത്തകര്‍ക്ക് വാക്സിന് നല്‍കിയിരുന്നു. പോലീസ്, റവന്യു, തദ്ദേശ സ്വയംഭരണം, സായുധ സേനാ വിഭാഗങ്ങളിലെ രജിസ്റ്റര്‍ ചെയ്ത ജീവനക്കാര്‍ക്കാണ് രണ്ടാം ഘട്ടത്തില്‍ കുത്തിവയ്പ് നല്‍കിയത്.
വിവിധ ആശുപത്രികള്‍ക്ക് പുറമെ കണ്ണൂര്‍ എആര്‍ ക്യാമ്പ്, സിവില്‍ സ്റ്റേഷന്‍ എന്നിവിടങ്ങളിലും വാക്സിനേഷന് സെന്‍ററുകള്‍ ഒരുക്കിയിരുന്നു. ആകെ 23 സൈറ്റുകളിലായി 35 സെഷനുകളായാണ് വെള്ളിയാഴ്ച വാക്സിന് നല്‍കിയത്.ഒന്നാം ഘട്ടത്തില്‍ 26,248 ആരോഗ്യ പ്രവര്‍ത്തകരാണ് കോവിഡ് വാക്സിന് സ്വീകരിച്ചത്. ഇന്നലെ കോവിഡ് വാക്സിന് സ്വീകരിച്ചവരില്‍ സിറ്റി പോലീസ് കമ്മീഷണര്‍ ആര്‍. ഇളങ്കോ, അഡീഷനല്‍ എസ്പി വി.ഡി. വിജയന്‍, സിആര്‍പിഎഫ് ഡെപ്യൂട്ടി കമാന്‍ഡന്‍റുമാരായ ആര്‍. ശരവണ, എം.ജെ. റീജന്‍, അസി. കമാന്‍ഡന്‍റ് പി.ടി. സന്തോഷ് എന്നിവരും ഉള്‍പ്പെടുന്നു.