കണ്ണൂർ: ഹയർ സെക്കൻഡറി പരീക്ഷയിൽ ജില്ലയിൽ 86.86 വിജയശതമാനം. വിഎച്ച്എസ്ഇ വിഭാഗത്തിൽ 73.79 ശതമാനവും ഓപ്പൺ സ്കൂൾ വിഭാഗത്തിൽ 45.28 ശതമാനവുമാണ് വിജയം. മൂന്നു സ്കൂളുകൾ നൂറുമേനി വിജയം നേടി.
കൂത്തുപറന്പ് നിർമലഗിരി റാണിജയ് എച്ച്എസ്എസും പരിയാരം കാരക്കുണ്ട് ഡോൺബോസ്കോ സ്പീച്ച് ആൻഡ് ഹിയറിംഗ് എച്ച്എസ്എസും പഴയങ്ങാടി വാദിഹുദ എച്ച്എസ്എസുമാണ് നൂറുശതമാനം വിജയം നേടിയത്. റാണിജയ് സ്കൂളിൽ 41 വിദ്യാർഥികളും പരിയാരം കാരക്കുണ്ട് ഡോൺബോസ്കോ സ്പീച്ച് ആൻഡ് ഹിയറിംഗ് എച്ച്എസ്എസിൽ 16 വിദ്യാർഥികളും വാദിഹുദയിൽ 103 വിദ്യാർഥികളുമാണ് പരീക്ഷയെഴുതിയത്. എല്ലാവരും ഉപരിപഠനത്തിന് യോഗ്യത നേടി.പ്ലസ് ടു വിഭാഗത്തിൽ 156 സ്കൂളുകളിൽനിന്നായി 30,386 കുട്ടികളാണ് പരീക്ഷയ്ക്കായി രജിസ്റ്റർ ചെയ്തത്. 30,240 പേർ പരീക്ഷയെഴുതി. 26,267 പേർ ഉപരിപഠനത്തിന് യോഗ്യത നേടി. 2536 കുട്ടികൾക്കാണ് മുഴുവൻ വിഷയങ്ങളിലും എ പ്ലസ് ലഭിച്ചത്. ഓപ്പൺ വിഭാഗത്തിൽ 2131 പേരാണ് പരീക്ഷയ്ക്ക് രജിസ്റ്റർ ചെയ്തത്. 2,065 പേർ പരീക്ഷയെഴുതി. 935 പേർ ഉപരിപഠനത്തിന് യോഗ്യത നേടി. 36 പേർക്ക് എല്ലാ വിഷയത്തിലും എ പ്ലസ് ലഭിച്ചു. വിഎച്ച്എസ്സി വിഭാഗത്തിൽ 1549 പേർ പരീക്ഷ എഴുതിയതിൽ 1143 പേർ ഉപരിപഠന യോഗ്യരായി.