പുതിയ പാചകവാതക കണക്ഷൻ എടുക്കുന്പോൾ ഉപഭോക്താവ് സെക്യൂരിറ്റിയായി നൽകുന്ന തുക കുത്തനെ ഉയർത്തി എണ്ണക്കമ്പനികളുടെ ഇരുട്ടടി.
ഇനി മുതൽ പുതിയ കണക്ഷൻ എടുക്കുന്പോൾ സിലിണ്ടർ ഒന്നിന് 2,200 രൂപ സെക്യൂരിറ്റിയായി അടക്കണം. നിലവിൽ ഇത് 1,450 രൂപയായിരുന്നു. 750 രൂപയുടെ വർധനയാണ് ഒറ്റയടിക്ക് ഉണ്ടായിരിക്കുന്നത്. പുതുക്കിയ നിരക്ക് നിലവിൽ വന്നു.
14.2 കിലോ സിലിണ്ടർ കണക്ഷന്റെ തുകയാണ് 1,450-ൽ നിന്ന് 2,200 രൂപയാക്കിയത്. ഇതിനു പുറമേ അഞ്ച് കിലോ സിലിണ്ടറിന്റെ സെക്യൂരിറ്റി ഡെപ്പോസിറ്റ് തുകയും വർധിപ്പിച്ചിട്ടുണ്ട്. ഇത് നിലവിൽ 800 രൂപയായിരുന്നത് 1,150 രൂപയാക്കി.
ഗ്യാസ് റെഗുലേറ്ററുകളുടെ വിലയും കൂട്ടി. നേരത്തെ 150 രൂപ ഈടാക്കിയിരുന്ന റെഗുലേറ്ററുകൾക്ക് ഇനി മുതൽ 250 രൂപ നൽകണം. അതായത് 14.2 കിലോ സിലിണ്ടർ കണക്ഷൻ എടുക്കുന്ന ഉപഭോക്താവിന് ഒറ്റയടിക്ക് 850 രൂപ അധികം നൽകേണ്ടി വരും. കൂടാതെ അഞ്ച് കിലോ സിലിണ്ടർ കണക്ഷനായി 450 രൂപയും അധികം നൽകേണ്ടി വരും.