കണ്ണൂർ: സംസ്ഥാനങ്ങൾക്ക് തൊഴിലുറപ്പ് പദ്ധതിയുടെ കുടിശിക തുക അടിയന്തരമായി നൽകാൻ കേന്ദ്രസർക്കാർ തയാറാകണമെന്ന് ഡോ.വി. ശിവദാസൻ എംപി ആവശ്യപ്പെട്ടു. തൊഴിലില്ലായ്മയും വിലക്കയറ്റവും സൃഷ്ടിച്ചിരിക്കുന്ന അഭൂതപൂർവമായ പ്രതിസന്ധി ജനങ്ങൾ നേരിടുമ്പോഴും തൊഴിലുറപ്പ് പദ്ധതി തുക നൽകാതിരുന്നത് പ്രതിഷേധാർഹമാണ്. പിന്നാക്കം നിൽക്കുന്നവരെ പിന്തുണയ്ക്കാനും സഹായിക്കാനുമായി രൂപപ്പെടുത്തിയ പദ്ധതിയാണ് മഹാത്മാഗാന്ധി ഗ്രാമീണ തൊഴിലുറപ്പ് പദ്ധതി. എന്നാൽ അതിന്റെ തുകപോലും നൽകാതെ വൈകിപ്പിക്കുകയാണ് സർക്കാർ. കേരളത്തിന് മാത്രമായി 700 കോടിയിലധികം രൂപ കുടിശികയായി നിലവിൽ കെട്ടിക്കിടക്കുകയാണ്. തൊഴിലുറപ്പ് പദ്ധതിയുടെ നടത്തിപ്പിൽത്തന്നെ മാതൃകയായ കേരളത്തിൽ തൊഴിൽ ദിനങ്ങൾ പുനഃസ്ഥാപിക്കാൻ ആവശ്യമായ തുക വകയിരുത്തണം. ഈ ആവശ്യങ്ങൾ ഉന്നയിച്ച് കേന്ദ്ര ഗ്രാമവികസന വകുപ്പ് മന്ത്രി ഗിരിരാജ് സിംഗിന് ഡോ. വി. ശിവദാസൻ എംപി കത്ത് നൽകി.