മട്ടന്നൂർ : ഓൺലൈൻ വ്യാപാര കമ്പനിയുടെ പേരിൽ പണം തട്ടിയതായി പരാതി. ഓൺലൈൻ ഷോപ്പിങ് സൈറ്റായ ആമസോണിന്റെ ജീവനക്കാരാണെന്ന് തെറ്റിദ്ധരിപ്പിച്ചാണ് 1250 രൂപ തട്ടിയെടുത്തത്.
പരിയാരത്തെ വി. രാഹുലിന്റെ വീട്ടിലെത്തിയ സംഘം സാധനം കൈമാറി ശേഷം പണം ഗൂഗിൾ പേ വഴി വാങ്ങുകയായിരുന്നു. വീട്ടിൽ ഇല്ലാതിരുന്ന ഇദ്ദേഹം ഒന്നും ഓർഡർ ചെയ്തിട്ടുണ്ടായിരുന്നില്ല.
തെറ്റിദ്ധരിച്ച് വീട്ടുകാർ പണം നൽകുകയായിരുന്നു. ആമസോണിന്റെതെന്ന് തോന്നിപ്പിക്കുംവിധം പായ്ക്ക് ചെയ്ത പൊതിയിൽ കീറത്തുണികൾ നിറച്ചാണ് തട്ടിപ്പ് നടത്തിയത്. വാനിലാണ് സംഘമെത്തിയത്. രാഹുലിന്റെ പരാതിയിൽ മട്ടന്നൂർ പോലീസ് കേസെടുത്ത് അന്വേഷണം തുടങ്ങി.