കണ്ണൂർ: ലോകത്തെവിടെ അസമാധാനം ഉണ്ടായാലും ലോകമാകെ പ്രതികരിക്കണമെന്ന് തലശേരി അതിരൂപത നിയുക്ത ആർച്ച്ബിഷപ് മാർ ജോസഫ് പാംപ്ലാനി. ” സമാധാനം മതി, യുദ്ധം വേണ്ട’ എന്ന മുദ്രാവാക്യം ഉയർത്തി പീപ്പിൾസ് മൂവ്മെന്‍റ് ഫോർ പീസ്, കണ്ണൂർ മഹാത്മാ മന്ദിരം എന്നിവയുടെ സംയുക്താഭിമുഖ്യത്തിൽ സംഘടിപ്പിച്ച ഉപവാസ പ്രാർഥനാസമരം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
അക്രമത്തിന്‍റെ മാർഗം ആരു സ്വീകരിച്ചാലും അവരെ ഒറ്റപ്പെടുത്തുന്ന സമീപനമാകണം ഓരോ രാജ്യങ്ങളും സ്വീകരിക്കേണ്ടത്. റഷ്യ യുക്രെയ്നിൽ നടത്തുന്ന യുദ്ധത്തിന്‍റെ ദുരന്തഫലം അനുഭവിക്കുന്നത് പിഞ്ചുകുഞ്ഞുങ്ങളും സ്ത്രീകളുമാണ്. ഓടി രക്ഷപെടാൻ പോലും പറ്റാത്ത അവസ്ഥയാണ് അവർക്ക്. ദിവസങ്ങളോളം ബങ്കറുകൾക്കുള്ളിൽ ഭക്ഷണം പോലുമില്ലാതെ നിരവധി പേരാണ് ഇപ്പോഴും കഴിയുന്നത്.
കേന്ദ്രസർക്കാരിന്‍റെ പ്രത്യേക ഇടപെടലിൽ യാതൊരു പണച്ചെലവുമില്ലാതെ ഇന്ത്യൻ വിദ്യാർഥികളെയെല്ലാം സ്വദേശത്ത് എത്തിക്കാൻ സാധിച്ചു. ഇതിനെ കേന്ദ്ര സർക്കാരിനെ പ്രത്യേകം അഭിനന്ദിക്കേണ്ടതുണ്ടെന്നും മാർ പാംപ്ലാനി പറഞ്ഞു.
സ്വാമി അമൃത കൃപാനന്ദപുരി, മുത്തലിബ് അസ്‌ലാമി, ഫാ.സ്റ്റീഫൻ ജയരാജ്, പ്രഫ. മുഹമ്മദ് അഹമ്മദ്, അഡ്വ. ബിനോയ് തോമസ്, ഫാ. സ്കറിയ കല്ലൂർ, മഹാത്മാ മന്ദിരം പ്രസിഡന്‍റ് ഇ.വി.ജി. നമ്പ്യാർ, ടി.പി.ആർ നാഥ്, കാരയിൽ സുകുമാരൻ, സരള ടീച്ചർ, സി.സുനിൽ കുമാർ, സിസ്റ്റർ കരോളിൻ, എം. മനോറാണി എന്നിവർ പ്രസംഗിച്ചു. “സമാധാനം മതി, യുദ്ധം വേണ്ട’ എന്ന പ്രമേയത്തിലുള്ള ചിത്രരചനയുടെ ഉദ്ഘാടനം ശില്പ പ്രിയേഷ് നിർവഹിച്ചു.
സമാപനസമ്മേളനം കണ്ണൂർ കോർപറേഷൻ മേയർ ടി.ഒ. മോഹനൻ ഉദ്ഘാടനം ചെയ്തു. പി. സതീഷ് കുമാർ അധ്യക്ഷത വഹിച്ചു. സജീവ് മാണിയത്ത്, ടി.എസ്. ജെയിംസ്, സുരേന്ദ്രനാഥ്, പ്രഫ.എം.ജി. മേരി എന്നിവർ പ്രസംഗിച്ചു.