നെടുംപൊയിൽ: 29-ാം മൈൽ നാലാം ഹെയർപിൻ വളവിന് സമീപം വനത്തിൽ മാലിന്യം നിക്ഷേപിച്ചവർക്കെതിരേ കണിച്ചാർ പഞ്ചായത്ത് 25000 രൂപ പിഴ ഈടാക്കി. കഴിഞ്ഞദിവസം രാത്രിയാണ് വാഹനത്തിൽ എത്തിച്ച മാലിന്യം വനത്തിൽ വലിച്ചെറിഞ്ഞത്.
നാട്ടുകാരുടെ പരാതിയെ തുടർന്ന് വാർഡ് മെമ്പർ ജിമ്മി ഏബ്രഹാമിന്റെ നേതൃത്വത്തിൽ നടത്തിയ പരിശോധനയിൽ കൂത്തുപറമ്പിലെ അബ്ദുൾ ജലീലിന്റെ ഉടമസ്ഥതയിലുള്ള ബാഗ് നിർമാണ യൂണിറ്റിലെ മാലിന്യമാണ് ഇവിടെ നിക്ഷേപിച്ചതെന്ന് വനംവകുപ്പിലും കേളകം പോലീസിലും പരാതി ലഭിച്ചു.
തുടർന്ന് സ്ഥാപന ഉടമയെ ബന്ധപ്പെട്ട് മാലിന്യം നീക്കാൻ നിർദേശിക്കുകയും വനത്തിൽ മാലിന്യ നിക്ഷേപം നടത്തിയതിന് പഞ്ചായത്ത് പിഴയീടാക്കുകയും ചെയ്തു. വനംവകുപ്പ് കേസെടുത്തിട്ടുമുണ്ട്.