ഇരിട്ടി : കെസിവൈഎം എസ്എംവൈഎം തലശേരി അതിരൂപതയുടെ ആഭിമുഖ്യത്തിൽ ക്രിസ്മസ് ആഘോഷങ്ങളോടനുബന്ധിച്ച് ഇരിട്ടി ടൗണിൽ 18ന് മലബാറിലെ ആദ്യ മെഗാ പാപ്പാ സംഗമം “ബോൺ നത്താലെ -2021′ നടക്കും.
നെല്ലിക്കാംപൊയിൽ ഫൊറോനയുടെ ആതിഥേയത്വത്തിൽ എടൂർ, പേരാവൂർ, കുന്നോത്ത് ഫൊറോനകളുടെ സഹകരണത്തോടെ ഇരിട്ടി ടൗണിൽ ശനിയാഴ്ച വൈകുന്നേരം നാലുമുതൽ 200 ക്രിസ്മസ് പാപ്പാമാർ സംഗമിക്കുന്ന ക്രിസ്മസ് സമാധാന സന്ദേശ യാത്രയാണ് പരിപാടിയുടെ മുഖ്യആകർഷണം.
വാദ്യമേളങ്ങളുടെ അകമ്പടിയോടെ നിശ്ചല ദൃശ്യങ്ങളുടെ സാന്നിധ്യവും പാപ്പാ റാലിക്ക് ഇരിട്ടി പട്ടണത്തിൽ ദൃശ്യവിരുന്നൊരുക്കും. തുടർന്ന് നടക്കുന്ന സാംസ്കാരിക സമ്മേളനത്തിലും ക്രിസ്മസ് കലാസന്ധ്യയിലും സാമൂഹിക- സാംസ്കാരിക-രാഷ്ട്രീയ രംഗങ്ങളിലെ പ്രമുഖർ സംബന്ധിക്കും. തലശേരി അതിരൂപത സഹായ മെത്രാൻ മാർ ജോസഫ് പാംപ്ലാനി ക്രിസ്മസ് സന്ദേശം നല്കും.
“ബോൺ നത്താലേ’ യുമായി ബന്ധപ്പെട്ട് നിരവധി പരിപാടികളാണ് കെസിവൈഎം ആസൂത്രണം ചെയ്തിരിക്കുന്നത്. ക്രിസ്മസ് ദിനാഘോഷങ്ങളുടെ ഭാഗമായി കണ്ണൂർ, കാസർഗോഡ് ജില്ലകളിലെ വിവിധ അഗതിമന്ദിരങ്ങളിലൂടെ നടത്തുന്ന ക്രിസ്മസ് കരോൾ യാത്രയാണ് പരിപാടിയുടെ അടുത്ത ഘട്ടം.
സംഗമത്തിന്റെ സ്വാഗത സംഘം രൂപീകരണ യോഗം ഇരിട്ടി സെന്റ് ജോസഫ് ദേവാലയത്തിൽ നടന്നു .
മെഗാപാപ്പ സംഗമത്തിന്റെ കൺവീനറായി കെസിവൈഎം തലശേരി അതിരൂപത പ്രസിഡന്റ് ജോയൽ ജോസഫ് തൊട്ടിയിൽ, രക്ഷാധികാരിയായി ഡയറക്ടർ ഫാ. ജിൻസ് വാളിപ്ലാക്കൽ, ജനറൽ കോ-ഓർഡിനേറ്റർമാരായി നെല്ലിക്കാംപൊയിൽ ഫൊറോന പ്രസിഡന്റ് മെൽവിൻ, എടൂർ ഫൊറോന പ്രസിഡന്റ് റോണിറ്റ്, കുന്നോത്ത് ഫൊറോന പ്രസിഡന്റ് ആൻഡേഴ്സൺ, പേരാവൂർ ഫൊറോന പ്രസിഡന്റ് അഖിൽ എന്നിവരെയും തെരഞ്ഞെടുത്തു.
ഫെറോന ഡയറക്ടേഴ്സ്, ആനിമേറ്റേഴ്സ്, അതിരൂപത, ഫൊറോന ഭാരവാഹികൾ എന്നിവരുടെ നേതൃത്വത്തിൽ വിവിധ കമ്മിറ്റികളും രൂപീകരിച്ചു പ്രവർത്തനമാരംഭിച്ചു.