കണ്ണൂർ: ലോക പൈതൃക വാരാഘോഷത്തിന്‍റെ ഭാഗമായി ആർക്കിയോളജിക്കൽ സർവേ ഓഫ് ഇന്ത്യ കണ്ണൂർ സെന്‍റ് ആഞ്ചലോസ് കോട്ടയിൽ പൈതൃക സ്മാരകങ്ങളുടെ ചിത്രപ്രദർശനം സംഘടിപ്പിച്ചു. ജില്ലാപഞ്ചായത്ത് പ്രസിഡന്‍റ് പി.പി. ദിവ്യ ഉദ്ഘാടനം ചെയ്തു. ഡെപ്യൂട്ടി സൂപ്രണ്ടിംഗ് ആർക്കിയോളജിക്കൽ കെമിസ്റ്റ് ഡോ. എം. പി.സുജിത്ത് അധ്യക്ഷത വഹിച്ചു. താജ്മഹൽ, ഒഡീഷയിലെ സൂര്യക്ഷേത്രം, ഗോവയിലെ പുരാതന ദേവാലയം തുടങ്ങി രാജ്യത്തെ അറുപതോളം പൈതൃകസ്മാരകങ്ങളുടെ ചിത്രങ്ങളാണ് പ്രദർശിപ്പിച്ചിരിക്കുന്നത്. കൂടാതെ ചിത്രങ്ങളുടെ താഴെ അവയെക്കുറിച്ചുള്ള വിശദമായ കുറിപ്പുമുണ്ട്. 25 വരെയാണ് പ്രദർശനം നടക്കുക.
ഈ മാസം 19ന് പാലക്കാട് കോട്ടയിൽ വച്ചാണ് ലോക പൈതൃകവാരാഘോഷത്തിന്‍റെ ഉദ്ഘാടനം നടന്നത്. 25ന് തലശേരി കോട്ടയിൽ സമാപനസമ്മേളനം നടക്കും. സൂപ്രണ്ടിംഗ് ആർക്കിയോളജിസ്റ്റ് കെ.മൂർത്തേശ്വരി അധ്യക്ഷത വഹിക്കും. തലശേരി നഗരസഭാധ്യക്ഷ ജമുന റാണി, ഉപാധ്യക്ഷൻ വാഴയിൽ ശശി എന്നിവർ പങ്കെടുക്കും.