മട്ടന്നൂർ: മുഴപ്പാല ബംഗ്ലാവ് മൊട്ടയിൽ അഗ്നിരക്ഷാ കേന്ദ്രവും അഗ്നിരക്ഷാ പരിശീലനത്തിനുള്ള ഇൻസ്റ്റിറ്റ്യൂട്ടും സ്ഥാപിക്കാൻ നടപടി തുടങ്ങി. പോലീസിന്റെ കൈവശമുള്ള നാലര ഏക്കർ സ്ഥലത്താണ് ഇൻസ്റ്റ്യൂട്ട് സ്ഥാപിക്കുക. അഗ്നിരക്ഷാ വിഭാഗം ഡയറക്ടർ ജനറൽ ബി. സന്ധ്യയുടെ നേതൃത്വത്തിലുള്ള സംഘം കഴിഞ്ഞ ദിവസം മുഴപ്പാല ബംഗ്ലാവ് മൊട്ട സന്ദർശിച്ചിരുന്നു. പ്രദേശത്തിന്റെ സാറ്റ്ലൈറ്റ് സർവെയും ഉന്നത ഉദ്യോഗസ്ഥരുടെ സാന്നിധ്യത്തിൽ ഇവിടെ നടത്തിയിരുന്നു. പോലീസ് വകുപ്പിന് കീഴിലുള്ള ഈ സ്ഥലം അഗ്നിരക്ഷാസേനക്ക് കൈമാറാനുള്ള നടപടി ക്രമങ്ങൾ ആരംഭിച്ചിട്ടുണ്ട്. ഫയർഫോഴ്സിന് കീഴിലുള്ള സംസ്ഥാനത്തെ ആദ്യത്തെ പരിശീലന കേന്ദ്രമാണ് മുഴപ്പാലയിൽ ആരംഭിക്കാൻ പോകുന്നത്. വിദേശത്തും നാട്ടിലും കൂടുതൽ തൊഴിലവസരമുള്ള ഹൃസ്വകാല കോഴ്സുകളാണ് ഇവിടെ നടത്തുക. വിശദമായ പദ്ധതി രേഖ തയാറാക്കി ഉടൻ തന്നെ സർക്കാരിന് സമർപ്പിക്കും.സിവിൽ ഡിഫൻസ് വിഭാഗത്തിന് കീഴിലുള്ള പ്രവർത്തകരാണ് ശുചീകരണം നടത്തുന്നത്. പോസ്റ്റ് വാർഡൻ എ.ഷഗിൽ, ഡെപ്യൂട്ടി പോസ്റ്റ് വാർഡൻ കെ. റിമിൽ, പി. ജോയ്, സിന്ദുബേബി, കെ.വി. സമീറ, രാഹുൽ തുടങ്ങിയവരാണ് ശുചീകരണ പ്രവർത്തനത്തിന് നേതൃത്വം നൽകുന്നത്.