കേളകം: യാത്രക്കാർക്ക് ഭീഷണിയായി കേളകം-പേരാവൂർ റോഡിൽ പൊന്തക്കാടും ടെലഫോൺ പോസ്റ്റും. ജെ.കെ. റസിഡൻസിക്കും -സാൻജോസ് പള്ളിക്കും ഇടയിലുള്ള ഭാഗമാണ് ഈ അപകട യാത്ര. റോഡിന് കാനയില്ല. മാത്രമല്ല കാൽനടയാത്രക്കാർക്ക് നടപ്പാതയുമില്ല. റോഡിലേക്ക് വളർന്നു നിൽക്കുന്ന പൊന്തക്കാടും കൂടെയാകുമ്പോൾ അപകടം വിളിപ്പാടകലെയാണ്. നിരവധി തവണ ഇവിടെ അപകടങ്ങൾ നടന്നിട്ടുണ്ട്.
ഇന്ത്യൻ പെട്രേൾ പമ്പിന് എതിർവശം വളവിൽനിൽക്കുന്ന ഉപയോഗശൂന്യമായ ടെലഫോൺ പോസ്റ്റും അപകട ഭീഷണി ഇരിട്ടിയാക്കുന്നു. റോഡിൽ വെള്ളം കുത്തിയൊഴുകിയത് മൂലം ഇരുവശങ്ങളിലും വെള്ളക്കെട്ടും ചെളിയുമാണ്.
ഇതുമൂലം യാത്രക്കാർ നടക്കുന്നത് റോഡിലൂടെയാണ്. ഏത് നിമിഷവും ഒരു ദുരന്തം ഇവിടെ ഉണ്ടാകുമെന്നാണ് പ്രദേശവാസികൾ പറയുന്നത്. ബന്ധപ്പെട്ട അധികാരികൾ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.