തിരുവനന്തപുരം: മദ്യവിലവർധന ഇന്നുമുതൽ പ്രാബല്യത്തിൽ വരും. ഒന്നാം തീയതിയായ ഇന്ന് അവധിയായതിനാൽ മദ്യശാലകൾ തുറക്കുന്ന നാളെ മുതൽ നടപ്പിൽ വരും. മദ്യ കന്പനികൾക്കുള്ള വില വർധനയുടെ ഭാഗമായാണു വില ഉയർത്തിയതെന്നാണു വിശദീകരണം. വിവിധ വിഭാഗങ്ങൾക്ക് 30 രൂപ മുതൽ 200 രൂപയുടെ വരെ വർധനയുണ്ടാകും.
വർധന വഴി പ്രതിവർഷം 1,000 കോടി രൂപയുടെ വരെ അധിക നികുതി സമാഹരിക്കാൻ കഴിയുമെന്നാണു കണക്കാക്കുന്നത്. മദ്യവില വർധനയുമായി ബന്ധപ്പെട്ടു പ്രതിപക്ഷം സർക്കാരിനെതിരേ അഴിമതിയാരോപണം ഉന്നയിച്ചിരുന്നു. മദ്യക്കന്പനികളുമായുള്ള ഒത്തുകളിയുടെ ഭാഗമായാണ് വില വർധിപ്പിച്ചതെന്നും ഇതിനു പിന്നിൽ കോടികളുടെ അഴിമതിയുണ്ടെന്നും പ്രതിപക്ഷ നേതാവ് ആരോപിച്ചിരുന്നു.