ലക്‌നൗ: ഉത്തർപ്രദേശിനെ ഒരു സംരംഭക കേന്ദ്രമാക്കി മാറ്റുന്നതിൽ പുതിയ അധ്യായം കുറിക്കാൻ യോഗി സർക്കാർ. സെപ്റ്റംബർ 25 മുതൽ 29 വരെ ഗ്രേറ്റർ നോയിഡയിലെ ഇന്ത്യ എക്‌സ്‌പോ മാർട്ടിൽ നടക്കുന്ന യുപി ഇന്റർനാഷണൽ ട്രേഡ് ഷോ-2024 (യുപിഐടിഎസ്-2024) ൽ പങ്കെടുക്കുന്നവർക്ക് ലോകോത്തര സൗകര്യങ്ങളാണ് ഒരുക്കിയിട്ടുള്ളത്. 72 രാജ്യങ്ങളിൽ നിന്നുള്ള ബിസിനസുകാര്‍, കലാകാരന്മാർ, വിവിധ ആഗോള കമ്പനികളുടെ സിഇഒമാർ, പ്രസിഡന്റുമാർ തുടങ്ങി നിരവധി പ്രമുഖർ ഈ പരിപാടിയിൽ പങ്കെടുക്കുന്നുണ്ട്.
യുപി ഇന്റർനാഷണൽ ട്രേഡ് ഷോയുടെ വെബ്‌സൈറ്റ് വഴി സന്ദർശകർക്ക് ലോഗിൻ ചെയ്ത് ഡിജിറ്റൽ ആക്‌സസ് ലഭിക്കും. യുപിഐടിഎസ് 2024 നെക്കുറിച്ചുള്ള എല്ലാ വിവരങ്ങളും നൽകുന്ന ഒരു മൊബൈൽ ആപ്ലിക്കേഷനും ലഭ്യമാണ്. ആൻഡ്രോയിഡ്, ഐഒഎസ് പ്ലാറ്റ്‌ഫോമുകളിൽ ലഭ്യമായ ഈ ആപ്പ്, പരിപാടിയുടെ അജണ്ട, ബ്രോഷർ, ഫെയർ ഡയറക്‌ടറി, സൗകര്യങ്ങൾ, ഷട്ടിൽ സർവീസ്, വേദി, ബന്ധപ്പെടേണ്ട നമ്പറുകൾ എന്നിവയെക്കുറിച്ചുള്ള വിവരങ്ങൾ നൽകുന്നു. പേയ്‌മെന്റ് ഗേറ്റ്‌വേ ആയും, രാജ്യത്തിനകത്തും പുറത്തുനിന്നുമുള്ള സന്ദർശകർക്ക് ഹോട്ടൽ ബുക്കിംഗ് സൗകര്യവും ഈ ആപ്പ് വാഗ്ദാനം ചെയ്യുന്നു. നോയിഡ, ഗ്രേറ്റർ നോയിഡ എന്നിവിടങ്ങളിൽ സൗജന്യ ഷട്ടിൽ സർവീസ് ലഭ്യമായ മൂന്ന് റൂട്ടുകളുടെ സമയക്രമവും ആപ്പിൽ ലഭ്യമാണ്. ക്യുആർ കോഡ് അധിഷ്ഠിത ഡിജിറ്റൽ എൻട്രിയും പാർക്കിംഗ് സൗകര്യവും ഒരുക്കിയിട്ടുണ്ട്.
ലോകമെമ്പാടുമുള്ള സന്ദർശകർക്ക് വേണ്ടി ആധുനിക സൗകര്യങ്ങളോടുകൂടിയ വിഐപി ലോഞ്ച് ട്രേഡ് ഷോയുടെ മാറ്റുകൂട്ടുന്നു. ഉത്തർപ്രദേശിലെ തനത് രുചിക്കൂട്ടുകൾക്കൊപ്പം മികച്ച ആഗോള വിഭവങ്ങൾ ആസ്വദിക്കാനുള്ള അവസരവും ഉണ്ടാകും. ബി2ബി, ബി2സി മീറ്റിംഗുകൾ എന്നിവയും സംഘടിപ്പിച്ചിട്ടുണ്ട്. വിവിധ സെക്ടറൽ സെഷനുകളിൽ പങ്കെടുക്കാൻ ആപ്പ് സഹായിക്കും. ലേസർ ഷോ, സാംസ്കാരിക പരിപാടികൾ എന്നിവയും സംഘടിപ്പിച്ചിട്ടുണ്ട്. ഒഡിഒപി, ഗ്രാമോദ്യോഗ്, ഖാദി, കൈത്തറി, പരമ്പരാഗത ഉൽപ്പന്നങ്ങൾ എന്നിവയുടെ പ്രദർശനവും പരിപാടിയുടെ ഭാഗമാണ്. സെപ്റ്റംബർ 27 ന് ഖാദി, ഗ്രാമോദ്യോഗ് വകുപ്പുകൾ സംയുക്തമായി ഖാദി അധിഷ്ഠിത ഫാഷൻ ഷോയും സംഘടിപ്പിക്കുന്നുണ്ട്.