തിരുവനന്തപുരം: അപകടകരമായ രീതിയിൽ നമ്പർ പ്ലേറ്റുപോലുമില്ലാത്ത ബൈക്കിൽ റോഡിലൂടെ അഭ്യാസം നടത്തിയ യുവാവിനെ പിടികൂടി. പാറശാല സ്വദേശിയായ അഭിജിതിനെയാണ് നെയ്യാറ്റിൻകര പൊലീസ് പിടികൂടിയത്. അപകടരമാംവിധം വാഹനമോടിച്ചതിന്, നമ്പര്‍ പ്ലേറ്റില്ലാതെ വാഹനമോടിച്ചതിനുമാണ് കേസ്.ഇക്കഴിഞ്ഞ 21 നാണ് ദേശീയ പാതയിലൂടെ അപകടകരമായി അഭിജിത് ബൈക്ക് ഓടിച്ചത്.
റോംഗ് സൈഡിൽ കയറി മുന്നിലെത്തുന്ന കാറുകളുടെയും കെ എസ് ആർ ടി സി ബസിന്‍റെയും മുന്നിലൂടെ പോലും പാഞ്ഞായിരുന്നു അഭ്യാസം. സുഹൃത്തുക്കളുടെ സഹായത്തോടെ ദൃശ്യങ്ങള്‍ പകര്‍ത്തി ഇന്‍സ്റ്റഗ്രാമിലും പോസ്റ്റ് ചെയ്യ്തിരുന്നു. ഈ വീഡിയോ ശ്രദ്ധയിൽപ്പെട്ട കേരള പൊലീസ് ‘എട മോനെ, നമുക്ക് ഉടനെ കാണാം’ എന്ന് ഫേസ്ബുക്ക് പോസ്റ്റിലൂടെ പറഞ്ഞിരുന്നു. ഇതിന് പിന്നാലെയാണ് അഭിജിതിനെ പിടികൂടിയത്. കേരള പൊലീസ് തന്നെയാണ് ഇക്കാര്യം ഫേസ്ബുക്ക് കുറിപ്പിലൂടെ വ്യക്തമാക്കിയത്.