ന്യൂയോർക്കിൽ സഹോദരന്റെ വെടിയേറ്റ് ഹൈദരാബാദ് സ്വദേശി മരിച്ചു

വാഷിംഗ്ടൺ ഡിസി: അമേരിക്കയിലെ ന്യൂയോർക്കിൽ സഹോദരനിൽ നിന്ന് അബദ്ധത്തിൽ വെടിയേറ്റ് ഹൈദരാബാദ് സ്വദേശി മരിച്ചു. ഹിക്സ്വില്ലിലാണ് സംഭവം. മുഹമ്മദ് ഇബ്രാഹിം അഹമ്മദാണ് (24) മരിച്ചത്. സംഭവത്തിൽ സഹോദരനായ മുഹമ്മദ് ബഷീർ അഹമ്മദിനെ (27) പൊലിസ് അറസ്റ്റ് ചെയ്തു.
വിവരം അറിഞ്ഞ് പൊലിസ് സ്ഥലത്തെത്തുമ്പോൾ, വാഹനത്തിനുള്ളിൽ വെടിയേറ്റ നിലയിലായിരുന്നു ഇബ്രാഹിമിനെ കണ്ടെത്തിയത്. ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ഇരുവരും വാഹനത്തിനുള്ളിലിരിക്കെ ബഷീറിന്റെ കൈവശമുണ്ടായിരുന്ന തോക്ക് അബദ്ധത്തിൽ പൊട്ടിയതാകാമെന്നാണ് പൊലിസിന്റെ നിഗമനം. സംഭവത്തിൽ കൂടുതൽ അന്വേഷണം നടന്നുവരികയാണ്.




