ന്യൂഡൽഹി ∙ ആധാറുമായി ബന്ധപ്പെട്ട വിരലടയാളം ശേഖരിക്കാൻ സ്കാനിങ് മെഷീനു പകരം ഭാവിയിൽ മൊബൈൽ ഫോൺ ക്യാമറ മതിയാകും. മൊബൈൽ ക്യാമറ ഉപയോഗിച്ചു വിരലടയാളം തിരിച്ചറിയാനുള്ള സംവിധാനം വികസിപ്പിക്കാൻ ആധാർ അതോറിറ്റി (യുഐഡിഎഐ) ശ്രമം തുടങ്ങി. ഐഐടി ബോംബെയുമായി ചേർന്നായിരിക്കും ടച്ച് ലെസ് ബയോമെട്രിക് സംവിധാനം വികസിപ്പിക്കുക.
നിലവിലെ ഫിംഗർപ്രിന്റ് സ്കാനിങ് മെഷീനിൽ പലപ്പോഴും വിരലടയാളം പതിയാൻ തടസ്സം നേരിടാറുണ്ട്. ഈ പ്രശ്നം മൊബൈൽ ക്യാമറയിലുണ്ടാകില്ല. സ്കാനിങ് മെഷീനുകൾ വാങ്ങുന്നതിന്റെ ചെലവും ലാഭിക്കാം. മെഷീൻ ലേണിങ് സംവിധാനം ഉപയോഗിച്ച് ക്യാമറയ്ക്കു മുന്നിലുള്ള വിരലുകൾ യഥാർഥമാണോയെന്നും ഉറപ്പാക്കും