സൗജന്യ കൈത്തറി യൂണിഫോം നൽകാത്ത ഒന്നു മുതൽ എട്ടുവരെ ക്ലാസുകളിൽ പഠിക്കുന്ന സർക്കാർ ഹൈസ്കൂളിലെ എപിഎൽ വിഭാഗം ആണ്‍കുട്ടികൾക്കും യുപി, എച്ച്എസ് വിഭാഗം എയ്ഡഡ് സ്കൂളിലെ ഒന്നു മുതൽ എട്ടു വരെയുള്ള മുഴുവൻ വിദ്യാർഥികൾക്കും ഒരു കുട്ടിക്ക് രണ്ടു ജോഡി യുണിഫോമിനു പണം നൽകാൻ 23 കോടി രൂപ അനുവദിച്ചതായി പൊതുവിദ്യാഭ്യാസമന്ത്രി വി. ശിവൻകുട്ടി അറിയിച്ചു.
3,91,104 കുട്ടികൾക്ക് ഇതിന്‍റെ ആനുകൂല്യം ലഭിക്കും. പൊതുവിദ്യാഭ്യാസ വകുപ്പിന്‍റെയും കൈത്തറി വകുപ്പിന്‍റെയും സംയുക്ത ആഭിമുഖ്യത്തിൽ നടപ്പിലാക്കി വരുന്ന സൗജന്യ കൈത്തറി യുണിഫോം പദ്ധതി പ്രകാരം രണ്ടു തരത്തിലാണ് നിലവിൽ യുണിഫോം നൽകി വരുന്നത്. സംസ്ഥാനത്തെ സ്റ്റാറ്റൻഡ് എലോണ് എൽപി, യുപി സർക്കാർ സ്കൂളിലും എൽപി വിഭാഗം എയ്ഡഡ് സ്കൂളിലുമാണ് കൈത്തറി യൂണിഫോം നൽകിവരുന്നതെന്നും മന്ത്രി കൂട്ടിച്ചേർത്തു.