ജില്ലയില്‍ വാനരവസൂരി സ്ഥിരീകരിച്ച സാഹചര്യത്തില്‍ പരിയാരത്തെ കണ്ണൂര്‍ ഗവ. മെഡിക്കല്‍ കോളജില്‍ ചികിത്സാസൗകര്യം വിപുലമാക്കി. കൂടുതല്‍ രോഗികള്‍ എത്തുന്ന സാഹചര്യമുണ്ടായാല്‍ ചികിത്സ നല്‍കാനുള്ള സംവിധാനമൊരുക്കിയതായി മെഡിക്കല്‍ സൂപ്രണ്ട് ഡോ. കെ. സുദീപ് പറഞ്ഞു. ഇതിനായി പ്രത്യേക വാര്‍ഡ് സജ്ജമാക്കി.
ഈ വാര്‍ഡിലെ ഒരു മുറിയിലാണ് നിലവില്‍ സ്ഥിരീകരിച്ച യുവാവിനെ പ്രവേശിപ്പിച്ചത്. കോവിഡ് പോലെ അധികം സംവിധാനങ്ങള്‍ ഈ രോഗത്തിന് ആവശ്യമില്ല. വെന്റിലേറ്റര്‍ സൗകര്യവും വേണ്ടിവരില്ല. നിരീക്ഷണമാണ് ആവശ്യം. ഇതിനുള്ള നടപടികള്‍ സ്വീകരിച്ചിട്ടുണ്ട്. നിലവില്‍ ചികിത്സയിലുള്ള യുവാവിന്റെ ആരോഗ്യസ്ഥിതി സാധാരണ നിലയിലാണ്. കോവിഡ് പോലെ രോഗം പെട്ടെന്ന് പകരാന്‍ സാധ്യതയില്ലാത്തതിനാല്‍ ആശങ്കപ്പെടേണ്ട കാര്യമില്ല.