പാചകവാതക സിലിണ്ടറിൽ തൂക്കക്കുറവെന്ന് പരാതി

അടക്കാത്തോട്: പാചകവാതക സിലിണ്ടറിൽ തൂക്കക്കുറവെന്ന് പരാതി. അടക്കാത്തോട് സ്വദേശി വെള്ളാറയിൽ ഇസ്മയിലിന് ലഭിച്ച പാചകവാതക സിലിണ്ടറിൽ അഞ്ച് കിലോയോളം തൂക്കക്കുറവ് ഉണ്ടെന്നാണ് പരാതി. വെള്ളിയാഴ്ച വൈകിട്ട് കേളകം ഇന്ത്യൻ ഗ്യാസ് ഏജൻസിയിൽ നിന്നാണ് ഗ്യാസ് ഇറക്കിയത്. സിലിണ്ടർ എടുത്തു മാറ്റുന്നതിനിടെ തൂക്കക്കുറവ് ഉണ്ടെന്ന സംശയത്തിനിടെ തൂക്കി നോക്കിയപ്പോഴാണ് തൂക്കക്കുറവ് കണ്ടെത്തിയത്. 30 കിലോയോളം തൂക്കം വരണ്ട ഗ്യാസ് സിലിണ്ടറിൽ തൂക്കി നോക്കിയപ്പോൾ 25 കിലോ മാത്രമാണ് കണ്ടെത്തിയത്. ഇതേ തുടർന്ന് കേളകം ഇന്ത്യൻ ഗ്യാസ് ഏജൻസിയെ പരാതി വിളിച്ച് അറിയിക്കുകയും ചെയ്തു. പ്ലാന്റിൽ നിന്നും എത്തിച്ച ഗ്യാസ് അതേപടി വിതരണം ചെയ്യുക മാത്രമാണ് ചെയ്തതെന്നും സിലിണ്ടർ മാറ്റി കൊടുക്കാൻ വേണ്ട നടപടികൾ സ്വീകരിക്കുമെന്നും ഏജൻസി ഉടമ അറിയിച്ചു.