തിരുവനന്തപുരം: ആശുപത്രിയിലേക്കുള്ള യാത്ര മധ്യേ കനിവ് 108 ആംബുലൻസിനുള്ളിൽ യുവതിക്ക് സുഖപ്രസവം. തോട്ടയ്ക്കാട് കരവാരം മരങ്ങാട്ട്കോണം സ്വദേശിനിയായ 24 കാരിയാണ് ആംബുലൻസിൽ പെൺകുഞ്ഞിന് ജന്മം നൽകിയത്. ചൊവ്വാഴ്ച പുലർച്ചെ പന്ത്രണ്ടരയോടെയാണ് സംഭവം. ആറ്റിങ്ങൽ താലൂക്ക് ആശുപത്രിയിൽ പ്രസവസംബന്ധമായ ചികിത്സ തേടിയ യുവതിയെ വിദഗ്ധ ചികിത്സയ്ക്കായി ഡോക്ടർ തിരുവനന്തപുരം എസ്.എ.ടി ആശുപത്രിയിലേക്ക് റെഫർ ചെയ്യുകയായിരുന്നു.
ഡോക്ടറാണ് കനിവ് 108 ആംബുലൻസിന്റെ സേവനം തേടിയത്. ഉടൻ അത്യാഹിത സന്ദേശം ആറ്റിങ്ങൽ താലൂക്ക് ആശുപത്രിയിലെ കനിവ് 108 ആംബുലൻസിനു കൈമാറി. ആംബുലൻസ് പൈലറ്റ് പ്രതീഷ് എസ്, എമർജൻസി മെഡിക്കൽ ടെക്‌നീഷ്യൻ നന്ദകുമാർ എം.എസ് എന്നിവർ ആശുപത്രിയിലെത്തി യുവതിയുമായി തിരുവനന്തപുരം എസ്.എ.ടി ആശുപത്രിയിലേക്ക് തിരിച്ചു. ആംബുലൻസ് മംഗലപുരം എത്തുമ്പോഴേക്കും യുവതിയുടെ ആരോഗ്യനില വഷളായി. എമർജൻസി മെഡിക്കൽ ടെക്‌നീഷ്യൻ നന്ദകുമാർ ആംബുലൻസിൽ വെച്ചുതന്നെ നടത്തിയ പരിശോധനയിൽ പ്രസവം എടുക്കാതെ മുന്നോട്ട് പോകുന്നത് അമ്മയ്ക്കും നവജാത ശിശുവിനും സുരക്ഷിതമല്ല എന്ന് മനസിലാക്കി ആംബുലൻസിൽ തന്നെ ഇതിനുവേണ്ട സജ്ജീകരണങ്ങൾ ഒരുക്കി.
പുലർച്ചെ 1.10ന് നന്ദകുമാറിന്റെ പരിചരണത്തിൽ യുവതി കുഞ്ഞിന് ജന്മം നൽകുകയായിരുന്നു. ഉടൻ നന്ദകുമാർ അമ്മയും കുഞ്ഞുമായുള്ള പൊക്കിൾകൊടി ബന്ധം വേർപ്പെടുത്തി ഇരുവർക്കും വേണ്ട പ്രഥമ ശുശ്രൂഷ നൽകി. തുടർന്ന് ഇരുവരെയും ആംബുലൻസ് പൈലറ്റ് പ്രതീഷ് തിരുവനന്തപുരം എസ്.എ.ടി ആശുപത്രിയിൽ എത്തിച്ചു. അമ്മയും കുഞ്ഞും സുഖമായി ഇരിക്കുന്നതായി ബന്ധുക്കൾ അറിയിച്ചു.