ദലിത് യുവതിയെ പീഡിപ്പിച്ചശേഷം തീവച്ചു കൊന്നു

ജയ്പുർ ∙ ദലിത് യുവതിയെ വീട്ടിൽ കയറി ബലാത്സംഗം ചെയ്തശേഷം തീവച്ചു കൊന്ന കേസിൽ ബാർമർ ജില്ലയിലെ ഷക്കൂർ ഖാനെ അറസ്റ്റ് ചെയ്തു. പൊള്ളലേറ്റ് ജോധ്പുരിലെ ആശുപത്രിയിലായിരുന്ന യുവതി (30) വെള്ളിയാഴ്ചയാണു മരിച്ചത്. പൊലീസ് മര്യാദയില്ലാതെ പെരുമാറുകയും ഭീഷണിപ്പെടുത്തുകയും ചെയ്തെന്ന് ആരോപിച്ച് യുവതിയുടെ ബന്ധുക്കൾ മൃതദേഹം ഏറ്റുവാങ്ങാൻ വിസമ്മതിച്ചു. ജില്ലാ പൊലീസ് സൂപ്രണ്ട് ഉൾപ്പെടെ 2 ഉന്നത ഉദ്യോഗസ്ഥരെ മാറ്റുക, ഒരുകോടി രൂപ സഹായധനം അനുവദിക്കുക, ഉറ്റ ബന്ധുക്കളിലൊരാൾക്ക് സർക്കാർ ജോലി നൽകുക എന്നീ ആവശ്യങ്ങളും അവർ ഉന്നയിച്ചിട്ടുണ്ട്.
ഇതേസമയം, 25 ലക്ഷം രൂപ സഹായധനം പ്രഖ്യാപിച്ചെങ്കിലും യുവതിയുടെ ബന്ധുക്കൾ വാങ്ങാൻ കൂട്ടാക്കിയില്ലെന്ന് ജോധ്പുർ എംഎൽഎ ബലോത്ര മദാൻ പ്രജാപത് പറഞ്ഞു. ജില്ലാ കലക്ടറുടെയും എംഎൽഎയുടെയും നേതൃത്വത്തിൽ അനുനയം തുടരുകയാണ്.

2 കുട്ടികളുടെ അമ്മയായ യുവതിയെ നാട്ടുകാരൻ കൂടിയായ ഷക്കൂർഖാൻ ഏപ്രിൽ 6ന് വീട്ടിൽ അതിക്രമിച്ചുകയറി പീഡിപ്പിച്ചശേഷം ആസിഡ് പോലുള്ള ദ്രാവകം ഒഴിച്ചു തീവച്ചെന്നാണു ഭർത്താവു നൽകിയ പരാതിയിൽ പറയുന്നത്.

സംഭവം രാജസ്ഥാൻ നിയമസഭയിൽ ഒച്ചപ്പാടുണ്ടാക്കി. അശോക് ഗെലോട്ടിന്റെ ഭരണത്തിൽ നിയമവാഴ്ച തകർന്നെന്നു പ്രതിപക്ഷം ആരോപിച്ചു.