കെഎസ്ആര്‍ടിസി ജീവനക്കാരുടെ ശമ്പളം അടുത്ത ബുധനാഴ്ചയ്ക്കകം നല്‍കണമെന്നു നിര്‍ദേശിച്ച ഹൈക്കോടതി, ജീവനക്കാര്‍ക്ക് ശമ്പളം നല്‍കാന്‍ സാധിക്കുന്നില്ലെങ്കില്‍ സ്ഥാപനം അടച്ചുപൂട്ടിക്കൂടേ എന്നു വാക്കാല്‍ ചോദിച്ചു. ശമ്പളവിതരണം വൈകുന്നതിനെതിരേ കെഎസ്ആര്‍ടിസിയിലെ ജീവനക്കാരനായ ആര്‍. ബാജി ഉള്‍പ്പെടെയുള്ളവര്‍ നല്‍കിയ ഹര്‍ജികളില്‍ ജസ്റ്റീസ് സതീഷ് നൈനാനാണ് ഇതു പറഞ്ഞത്.
പ്രതിദിനം 26 ലക്ഷം പേര്‍ യാത്രയ്ക്കായി കെഎസ്ആര്‍ടിസിയെ ആശ്രയിക്കുന്നുണ്ടെന്നും സ്ഥാപനം പൂട്ടിയാല്‍ അവരെ ബാധിക്കുമെന്നും കെഎസ്ആര്‍ടിസിയുടെ അഭിഭാഷകന്‍ വിശദീകരിച്ചെങ്കിലും കെഎസ്ആര്‍ടിസി പൂട്ടിയാല്‍ യാത്രക്കാര്‍ വേറെ വഴി കണ്ടെത്തിക്കോളുമെന്നായിരുന്നു സിംഗിള്‍ ബെഞ്ചിന്‍റെ മറുപടി. വിആര്‍എസ് എടുത്തു പോകാന്‍ തയാറാണെന്നു ഹര്‍ജിക്കാരന്‍റെ അഭിഭാഷകനും പറഞ്ഞു.
ശമ്പളത്തിന്‍റെ 45-50 ശതമാനം എല്ലാ മാസവും അഞ്ചാം തീയതിക്കു മുമ്പ് നല്‍കാന്‍ തയാറാണെന്നും ബാക്കി തുക സര്‍ക്കാര്‍ 50 കോടി ധനസഹായം നല്‍കുന്നതിന്‍റെ തൊട്ടടുത്ത ദിവസം നല്‍കാമെന്നും കഴിഞ്ഞ ദിവസം കെഎസ്ആര്‍ടിസി സത്യവാങ്മൂലം നല്‍കിയിരുന്നു.
ജീവനക്കാര്‍ക്ക് ശമ്പളം കൊടുക്കാന്‍ അടുത്ത ഏപ്രില്‍ മുതല്‍ ധനസഹായം നല്‍കില്ലെന്നു സര്‍ക്കാര്‍ അറിയിച്ചിട്ടുണ്ടെന്നും കെഎസ്ആര്‍ടിസി സ്വന്തം നിലയ്ക്കു ചെലവിനുള്ള വഴി കണ്ടെത്തണമെന്ന് സര്‍ക്കാര്‍ നിര്‍ദേശിച്ചിട്ടുണ്ടെന്നും സത്യവാങ്മൂലത്തില്‍ പറഞ്ഞിരുന്നു.
വരുമാനം വര്‍ധിപ്പിക്കാനുള്ള കെഎസ്ആര്‍ടിസി മാനേജ്മെന്‍റിന്‍റെ ഒരു നടപടിയും സ്റ്റേ ചെയ്യില്ലെന്ന് ഇന്നലെ ഹര്‍ജി പരിഗണിച്ചപ്പോള്‍ ഹൈക്കോടതി പറഞ്ഞു. ജീവനക്കാരുടെ ശമ്പളം എന്നു വിതരണം ചെയ്യാന്‍ കഴിയുമെന്നും ചോദിച്ചു.
അടുത്ത ബുധനാഴ്ചയ്ക്കകം ശമ്പളം നല്‍കാമെന്നു കോര്‍പറേഷന്‍ മറുപടി നല്‍കി. തുടര്‍ന്നാണ് ഇതു പാലിക്കാന്‍ സിംഗിള്‍ ബെഞ്ച് വാക്കാല്‍ നിര്‍ദേശിച്ചത്. ഹര്‍ജികള്‍ ഈ മാസം 15നു വീണ്ടും പരിഗണിക്കും.
പ്രതിമാസം 50 കോടി രൂപ ശമ്പള വിതരണത്തിനായി സര്‍ക്കാര്‍ നല്‍കുന്നുണ്ടെങ്കിലും ഇത്തവണ 30 കോടി രൂപ മാത്രമാണു ധനവകുപ്പ് അനുവദിച്ചിട്ടുള്ളതെന്നും കെഎസ്ആര്‍ടിസി വിശദീകരിച്ചു.