വൊക്കേഷണൽ ഹയർ സെക്കൻഡറി തൊഴിൽമേളകൾ എല്ലാ ജില്ലകളിലും സംഘടിപ്പിക്കുമെന്നു മന്ത്രി വി. ശിവൻകുട്ടി. ഈ അധ്യയന വർഷത്തിൽ എംപ്ലോയ്മെന്റ് ആൻഡ് ട്രെയിനിംഗ് വകുപ്പിന്‍റെ സഹകരണത്തോടെയാണ് മേള സംഘടിപ്പിക്കുന്നതെന്നും വിഎച്ച്എസ്‌സി വകുപ്പിന്‍റെ ആഭിമുഖ്യത്തിൽ തിരുവനന്തപുരത്തു സംഘടിപ്പിച്ച തൊഴിൽ മേള ഉദ്ഘാടനം ചെയ്യവേ മന്ത്രി പറഞ്ഞു.
പ്രധാനമായി അഞ്ചു മേഖലകളിലെ തൊഴിൽ സാധ്യതകളാണ് ഉദ്യോഗാർഥികളെ പരിചയപ്പെടുത്തുന്നത്. എൻജിനിയറിംഗ്, അഗ്രികൾച്ചറൽ ആൻഡ് ഫിഷറീസ്, പാരാമെഡിക്കൽ, കൊമേഴ്സ് ആൻഡ് ടൂറിസം, ജനറൽ കാറ്റഗറി എന്നിങ്ങനെയാണിത്.
വൊക്കേഷണൽ വിഷയങ്ങൾ പഠിച്ച വിദ്യാർഥികൾക്ക് ഈ മേഖലയിലെ സ്വകാര്യ സ്ഥാപനങ്ങളിൽ തൊഴിൽ നേടാൻ ഇതുവഴി സാധിക്കും. തിരുവനന്തപുരത്തു സംഘടിപ്പിച്ച തൊഴിൽ മേളയിൽ വൊക്കേഷണൽ ഹയർ സെക്കൻഡറി പാസായ 2700 ഉദ്യോഗാർഥികൾ രജിസ്റ്റർ ചെയ്തു. 80 കമ്പനികൾ മേളയിൽ പങ്കെടുത്തു. 542 പേരെ കമ്പനികൾ ഷോർട്ട് ലിസ്റ്റ് ചെയ്തു.