സംസ്ഥാനത്ത് സാമൂഹിക സുരക്ഷാ പെന്ഷന് വിതരണം ചെയത വകയില്‍ സര്‍ക്കാര്‍ സഹകരണ സംഘങ്ങള്‍ക്ക് നല്‍കാനുള്ള ഇന്‍സെന്‍റീവ് കുടിശിക കോടികള്‍. ഒരു പെന്ഷന് വിതരണം ചെയ്യുന്നതിനു സഹകരണ സ്ഥാപനങ്ങളിലെ കളക്ഷന്‍ ഏജന്‍റുമാര്‍ക്ക് സര്‍ക്കാര്‍ ഉത്തരവ് പ്രകാരം 50 രൂപ വീതം നല്‍കിയിരുന്നതാണ്. എന്നാല്‍ 2021 നവംബര്‍ മുതല്‍ ഇതുമുടങ്ങി. ഇതോടെ സഹകരണ സംഘങ്ങള്‍ക്കു സര്‍ക്കാര്‍ നല്‍കാനുള്ള ഇന്‍സെന്‍റീവ് കുടിശിക 140 കോടി രൂപയായി ഉയര്‍ന്നു. എന്നാല്‍ പുതിയ ഉത്തരവ് പ്രകാരം മുന്‍കാല പ്രാബല്യത്തോടെ ഇന്‍സെന്‍റീവ് വെട്ടിക്കുറച്ചതോടെ അവശേഷിക്കുന്നത് 98 കോടി രൂപയും. എന്നാല്‍ ഈ തുകയും എന്നു ലഭിക്കുമെന്നു വ്യക്തതയില്ല.
കുടിശിക വിഷയത്തില്‍ സിഐടിയു അടക്കമുള്ള സംഘടനകള്‍ പ്രതിഷേധം രേഖപ്പെടുത്തിയിട്ടും സര്‍ക്കാരിനു അനങ്ങാപ്പാറ നയമാണെന്നു യൂണിയന്‍ ഭാരവഹികള്‍ വ്യക്തമാക്കുന്നു. പെന്ഷന് തുക വീടുകളിലെത്തിച്ച് നല്‍കുന്നതിന് ഒരു പെന്ഷന് 50 രൂപ വീതമാണ് സര്‍ക്കാര്‍ ഉത്തരവ് പ്രകാരം നല്‍കിയിരുന്നത്. 40 രൂപ ഏജന്‍സിക്കും 10 രൂപ ഏജന്‍റിനും.
2021 നവംബറിനു ശേഷം സാമ്പത്തിക പ്രതിസന്ധിയെ തുടര്‍ന്ന് ഈ തുക നല്‍കിയിട്ടില്ല. ഇതിനുശേഷമാണു സഹകരണ, ധന മന്ത്രിമാരുടെ നേതൃത്വത്തില്‍ നടത്തിയ ചര്‍ച്ചയില്‍ നിലവിലെ കുടിശിക മൂന്നു തവണകളായി നല്‍കാമെന്നും പുതിയ പെന്ഷന് വിതരണത്തിന് ഇന്‍സെന്‍റീവ് 50ല്‍നിന്ന് 30 ആയി കുറവു ചെയ്യുന്നതിനും ധാരണയായത് (25 സഹകരണ സംഘത്തിനും 5 ഏജന്‍റിനും). ഇതിന് മുന്‍കാലപ്രാബല്യം നല്‍കിയതോടെയാണ് കുടിശിക 98 കോടിയായി കുറഞ്ഞത്. ചില സഹകരണ സംഘങ്ങള്‍ സ്വന്തം ഫണ്ടില്‍നിന്നെടുത്താണു കഴിഞ്ഞ ഓണക്കാലത്ത് ഏജന്‍റുമാര്‍ക്ക് ഇന്‍സെന്‍റീവ് നല്‍കിയത്. കുടിശിക വിതരണം ചെയ്യാന്‍ വൈകുന്നതോടെ ഇവരും വെട്ടിലായിരിക്കുകയാണ്.