മണ്ഡല- മകരവിളക്ക് തീർഥാടനത്തിന്റെ ഭാഗമായി പമ്പ സ്‌പെഷ്യൽ സർവീസ്‌ നടത്തിയ കെഎസ്ആർടിസിക്ക് ദിവസവരുമാനത്തിൽ റെക്കോഡ്. തീർഥാടനകാലം ആരംഭിച്ചശേഷം 20നു നടത്തിയ സർവീസുകളിൽനിന്ന്‌ മാത്രം ഒരുകോടി രൂപ വരുമാനം ലഭിച്ചു. പമ്പയിൽനിന്ന്‌ വിവിധ സ്ഥലങ്ങളിലേക്ക്‌ നടത്തിയ പമ്പ സ്‌പെഷ്യൽ സർവീസുകളിൽനിന്ന്‌ 1,01,55048 രൂപയാണ് ലഭിച്ചത്‌. മണ്ഡലകാലം ആരംഭിച്ചശേഷമുള്ള ഏറ്റവും ഉയർന്ന ദിവസവരുമാനമാണിത്‌. ഒന്നേകാൽ ലക്ഷം തീർഥാടകർ ചൊവ്വാഴ്ച ശബരിമലയിലെത്തി.
ലക്ഷത്തിനടുത്ത് തീർഥാടകരാണ്‌ ദിവസേന സന്നിധാനത്തെത്തുന്നത്‌. തെണ്ണൂറായിരംപേർ വിർച്വൽ ക്യൂ വഴിയും പതിനായിരത്തോളംപേർ സ്പോട്ട്‌ ബുക്കിങിലൂടെയും മലചവിട്ടുന്നുണ്ട്‌. തീർഥാടനത്തിനെത്തുന്നവരിൽ ഏറെയും കെഎസ്‌ആർടിസിയെ ആശ്രയിക്കുന്നുണ്ടെന്നാണ്‌ കണക്കുകൾ വ്യക്തമാക്കുന്നത്‌. പമ്പ ഡിപ്പോയിൽനിന്ന്‌ 40 ബസുകൾ അന്തർ സംസ്ഥാന സർവീസ്‌ നടത്തുന്നുണ്ട്‌. മറ്റു ഡിപ്പോകളിൽനിന്ന്‌ പമ്പയിലേക്ക്‌ പ്രത്യേക സർവീസുകളും നടത്തുന്നുണ്ട്‌.