കണ്ണൂർ: ഖാദി ആന്‍ഡ് വില്ലേജ് ഇൻഡസ്ട്രീസ് കമ്മീഷന്‍റെയും ഖാദി കമ്മീഷന്‍റെയും സഹായത്തോടെ രൂപീകരിച്ച കണ്ണൂർ ബീ കീപ്പിംഗ് ക്ലസ്റ്ററിന്‍റെ നേതൃത്വത്തിൽ കണ്ണൂർ മഹാത്മാ മന്ദിരത്തിൽ തേൻ മഹോത്സവം ആരംഭിച്ചു. കണ്ണൂർ, കാസർഗോഡ്, കോഴിക്കോട് ജില്ലകളിലെ മുന്നൂറോളം തേനീച്ച കർഷകരാണ് രണ്ടു ദിവസങ്ങളിലായി നടക്കുന്ന പരിപാടിയിൽ പങ്കെടുക്കുന്നത്.
പരിപാടിയുടെ ഭാഗമായി സെമിനാറുകൾ, വിവിധ ക്ലാസുകൾ, കർഷകരെ ആദരിക്കൽ, കാർഷിക പ്രശ്നോത്തരി, ഉത്പന്ന പ്രദർശന വില്പനമേള തുടങ്ങിയവയും നടക്കും. ഖാദി ആൻഡ് വില്ലേജ് ഇൻഡസ്ട്രീസ് സംസ്ഥാന ഡയറക്‌ടർ സി.ജി ആണ്ടവർ തേൻ മഹോത്സവം ഉദ്ഘാടനം ചെയ്തു. ജില്ലാ വ്യവസായ കേന്ദ്രം ജനറൽ മാനേജർ എ.എസ്.ഷിറാസ് അധ്യക്ഷത വഹിച്ചു. അഗ്രികൾച്ചറൽ ഡിഡിഎച്ച് അജിമോൾ, എൽ.ഡി.എം രാജ്കുമാർ, ബീ കീപ്പിംഗ് ക്ലസ്റ്റർ പ്രസിഡന്‍റ് ഷാജു ജോസഫ്, സെക്രട്ടറി സി. മനോജ് കുമാർ എന്നിവർ പ്രസംഗിച്ചു.
ഗുണമേന്മയുള്ള തേൻ ഉത്പാദനം എന്ന വിഷയത്തിൽ ഹോർട്ടി കോർപ്പ് റീജണൽ മാനേജരും മാവേലിക്കര ബീ കീപ്പിംഗ് ട്രെയിനിംഗ് കോളജ് മേധാവിയുമായ ബി.സുനിൽ ക്ലാസെടുത്തു. തേനീച്ച വളർത്തലിൽ കിസാൻ വാണിയുടെ പങ്ക് എന്ന വിഷയത്തിൽ കണ്ണൂർ ആകാശവാണിയിലെ കിസാൻ വാണി പ്രോഗ്രാം ഡയറക്‌ടർ പി.വി. പ്രശാന്ത് കുമാർ വിഷയാവതരണം നടത്തി. യൂട്യൂബിലൂടെ വ്യവസായ സംരംഭങ്ങളെ പൊതുജനങ്ങൾക്ക് പരിചയപ്പെടുത്തുകയും പ്രോത്സഹിപ്പിക്കുകയം ചെയ്യുന്ന ഫിറോസ് കണ്ണിപ്പൊയിലിനെ മലബാർ ഹണി ഏർപ്പെടുത്തിയ പ്രശസ്തിപത്രവും കാഷ് അവാർഡും നൽകി ആദരിച്ചു. അവാർഡും വിതരണം ചെയ്തു. തേൻ മഹോത്സവത്തിന്‍റെ സമാപനം ഇന്നു വൈകുന്നേരം നടക്കും. സമാപനസമ്മേളനത്തിൽ മികച്ച തേൻ കർഷകരെ ആദരിക്കും.
തേൻ മഹോത്സവത്തിന് തുടക്കം
