ശബരിമല തീർഥാടന കാലത്ത് പമ്പയിൽനിന്നു സ്പെഷൽ സർവീസ് നടത്തുന്നതിനായി തിരുവനന്തപുരം സിറ്റിയിൽനിന്നു 52 കെഎസ്ആർടസി ബസുകൾ ഇന്ന് പമ്പയിലേക്ക് പോകും. ഏറ്റവും മികച്ച കണ്ടീഷനിലുള്ള ബസുകളാണ് പമ്പ സ്പെഷലിന് പൂൾ ചെയ്തിരിക്കുന്നത്. ഇത് തിരുവനന്തപുരം നഗരത്തിലും പരിസര പ്രദേശങ്ങളിലും യാത്രാ ക്ലേശം വർധിപ്പിക്കാനിടയാക്കും.
പേരൂർക്കടയിൽനിന്നും 16 ബസുകളും പാപ്പനംകോട് നിന്നും ഒൻപതും വികാസ് ഭവനിൽ നിന്നും 18 എണ്ണവും സിറ്റിയിൽ നിന്നും 11 ബസുകളാണ് സ്പെഷൽ സർവീസുകൾക്കായി ഇന്ന് പമ്പയിലേയ്ക്ക് അയയ്ക്കുന്നത്.
ഈ ഡിപ്പോകളിൽ നിന്നും പൂൾ ചെയ്തിട്ടുള്ള ബസുകളിലെ കണ്ടക്ടർമാരും ഡ്രൈവർമാരും ഇന്ന് തന്നെ ബസുമായി പമ്പ സ്പെഷൽ ഓഫീസർ മുമ്പാകെ റിപ്പോർട്ട് ചെയ്യാനാണ് ജില്ലാ ഓഫീസർ (സൗത്ത്) നിർദ്ദേശിച്ചിരിക്കുന്നത്.