പേരാവൂർ: പേരാവൂർ ബ്ലോക്ക് പഞ്ചായത്ത് ഭരണസമിതി യോഗത്തിൽ കോൺഗ്രസ് ബ്ലോക്ക് അംഗം നേതാവ് ബൈജു വർഗീസ് ബഫർ സോൺ പ്രശ്നത്തിൽ അവതരിപ്പിച്ച അടിയന്തരപ്രമേയം ചർച്ചയ്ക്ക് എടുത്തില്ലെന്നു പരാതി. മലയോര മേഖലയിലെ ജനങ്ങളുടെ ഗൗരവമായ പ്രശ്നമായ വന്യജീവികേന്ദ്രത്തിൽ നിന്ന് ഒരു കിലോമീറ്റർ ബഫർ സോൺ ആയി പ്രഖ്യാപിച്ച തീരുമാനത്തിനെതിരെ ബഫർ സോൺ സീറോ പോയിന്റ് ആയി നിശ്ചയിക്കണമെന്നും 2019 ഒക്ടോബർ 23 ന് ചേർന്ന ഒന്നാം പിണറായി സർക്കാറിന്റെ മന്ത്രിസഭ തീരുമാനപ്രകാരം ബഫർ സോൺ വന്യജീവി സങ്കേതത്തിൽ നിന്ന് ഒരു കിലോമീറ്റർ നിശ്ചയിച്ച മന്ത്രിസഭ തീരുമാനം തിരുത്തണമെന്നും ബ്ലോക്ക് ഭരണ സമിതി ഒറ്റക്കെട്ടായി തീരുമാനമെടുക്കണമെന്നും ആവശ്യപ്പെട്ടായിരുന്നു അടിയന്തര പ്രമേയ നോട്ടീസ് നൽകിയത്.
എന്നാൽ നോട്ടീസ് മുൻകൂട്ടി നൽകാത്തതിനാൽ അടുത്ത ഭരണസമിതിയിൽ ചർച്ചയ്ക്കെടുക്കാമെന്നു പറഞ്ഞ് തള്ളുകയായിരുന്നു. ഈ വിഷയം സിപിഎമ്മിന് അടിയന്തര പ്രാധാന്യമില്ലാത്തതായതിൽ അവരുടെ കർഷകദ്രോഹ സമീപനം വ്യക്തമാണെന്ന് ബൈജു വർഗീസ് പറഞ്ഞു.
previous post