മട്ടന്നൂർ: മട്ടന്നൂരിൽ റവന്യൂ ടവറിന്‍റെ നിർമാണം അവസാനഘട്ടത്തിലെത്തി. ആറുമാസത്തിനുള്ളിൽ നിർമാണം പൂർത്തീകരിച്ച് ഉദ്ഘാടനം നടത്താനുള്ള ശ്രമത്തിലാണ് അധികൃതർ. സർക്കാർ ഓഫീസുകളെ ഒരു കുടക്കീഴിലാക്കുന്നതിന് 28 കോടിയോളം രൂപ ചെലവഴിച്ചാണ് മിനി സിവിൽ സ്റ്റേഷൻ നിർമിക്കുന്നത്. ഏഴുനിലക്കെട്ടിടത്തിന്‍റെ അഞ്ചു നിലകളുടെ നിർമാണമാണ് ആദ്യഘട്ടം പൂർത്തിയായത്. കെട്ടിടത്തിന്‍റെ കോൺക്രീറ്റിംഗ് ജോലികൾ പൂർത്തിയായി. പ്ലാസ്റ്ററിംഗ് കഴിഞ്ഞ സ്ഥലങ്ങളിൽ പെയിന്‍റിംഗും തുടങ്ങി.
രണ്ടു വർഷം മുമ്പാണ് റവന്യൂടവറിന്‍റെ നിർമാണം തുടങ്ങിയത്. ഹൗസിംഗ് ബോർഡാണ് നിർമാണച്ചുമതല ഏറ്റെടുത്തിരിക്കുന്നത്. കിഫ്ബിയുടെ സഹായത്തോടെയാണ് കെട്ടിടം നിർമിക്കുന്നത്. ഹിൽട്രാക്ക് കൺസ്ട്രക്ഷൻ കമ്പനിയാണ് കരാർ ഏറ്റെടുത്തിരിക്കുന്നത്. നാലുനിലകളിൽ ഓഫീസ് സമുച്ചയവും താഴത്തെനില വാഹന പാർക്കിംഗിനുമാണ് ഉപയോഗിക്കുക. റവന്യൂടവറിനോട് ചേർന്ന് കാന്‍റീൻ ബ്ലോക്കിന്‍റെ നിർമാണവും പുരോഗമിക്കുകയാണ്. മൂന്നുലക്ഷം ലിറ്റർ സംഭരണ ശേഷിയുള്ള വാട്ടർടാങ്കിന്‍റെ നിർമാണവും പൂർത്തിയായി.
മട്ടന്നൂരിൽ വിവിധയിടങ്ങളിലായി വാടകക്കെട്ടിടങ്ങളിലും മറ്റും പ്രവർത്തിക്കുന്ന സർക്കാർ ഓഫീസുകൾ പലതും റവന്യൂ ടവർ പൂർത്തിയാകുന്നതോടെ ഇവിടേക്ക് മാറും. 2018 ജൂണിലാണ് മിനി സിവിൽ സ്റ്റേഷൻ നിർമാണത്തിന് മന്ത്രിസഭ അംഗീകാരം നൽകിയത്. 2019 ഒക്ടോബറിലാണ് മുഖ്യമന്ത്രി പിണറായി വിജയൻ റവന്യൂ ടവറിന്‍റേയും സ്‌പെഷ്യാലിറ്റി ആശുപത്രിയുടേയും ശിലാസ്ഥാപനം നടത്തിയത്. റവന്യുടവറിന്‍റെ പിൻഭാഗത്തായാണ് സ്‌പെഷ്യാലിറ്റി ആശുപത്രിയുടെ പണി നടക്കുന്നത്.
കോവിഡ് ലോക്ക്ഡൗൺ ഉൾപ്പെടെയുള്ള തടസങ്ങൾ മൂലം വൈകിയാണ് നിർമാണ പ്രവൃത്തി തുടങ്ങാനായത്. കെ.കെ. ശൈലജ എംഎൽഎയുടെ നേതൃത്വത്തിൽ ഉദ്യോഗസ്ഥരെ പങ്കെടുപ്പിച്ച് യോഗം ചേർന്നു നിർമാണ പ്രവൃത്തി വിലയിരുത്തി. വേഗത്തിൽ നിർമാണം പൂർത്തീകരിച്ച് ഉദ്ഘാടനം നടത്തുമെന്ന് എംഎൽഎ പറഞ്ഞു. യോഗത്തിൽ നഗരസഭ ചെയർപേഴ്സൺ അനിത വേണു, വൈസ് ചെയർമാൻ പി. പുരുഷോത്തമൻ തുടങ്ങിയവർ പങ്കെടുത്തു.