കെഎസ്ആർടിസി ശമ്പള വിതരണത്തിൽ വിവേചനമെന്ന് ഹൈക്കോടതി. കെഎസ്ആർടിസിയിലെ സാധാരണക്കാരായ ജീവനക്കാർക്ക് ശമ്പളം നൽകാതെ ഉന്നത ഉദ്യോഗസ്ഥർക്ക് ശമ്പളം നൽകുന്നത് വിവേചനമാണെന്നാണ് ഹൈക്കോടതിയുടെ വിമർശനം.
പൊതുമേഖലാ സ്ഥാപനമായ കെഎസ്ആർടിസിയിൽ ഉന്നത ഉദ്യോഗസ്ഥരുടെ ശമ്പള വിതരണം തടയണമെന്നാവശ്യപ്പെട്ട് ജീവനക്കാർ നൽകിയ ഹർജിയിലാണ് കോടതി ഇടപെടൽ.
സാധാരണക്കാരായ ജീവനക്കാർക്ക് ശമ്പളം നൽകാത്ത സാഹചര്യത്തിൽ ഉന്നത ഉദ്യോഗസ്ഥരുടെ ശമ്പളം തടയണമെന്ന ജീവനക്കാരുടെ ആവശ്യം ന്യായമാണെന്നും ജസ്റ്റിസ് ദേവൻ രാമചന്ദ്രൻ പറഞ്ഞു. ഹർജിയിൽ മറുപടി നൽകണമെന്ന് കെഎസ്ആർടിസിക്ക് കോടതി നിർദേശം നൽകി.